iklan

MUNISÍPIU, SAÚDE, VIQUEQUE

Postu saúde Uaimori rejista moras ISPA 800 durante fulan-sia

Postu saúde Uaimori rejista moras ISPA 800 durante fulan-sia

Postu saúde Uaimori, Viqueque. Imajen Tatoli/Vitorino Lopes da Costa

VIQUEQUE, 02 outubru 2023 (TATOLI)Pesoál saúde hosi postu saúde iha suku Uaimori, postu Viqueque Vila, munisípiu Viqueque rejista moras Insfesaun Vias Respiratóriu Aguda (ISPA) hamutuk 800, durante fulan-sia, hahú janeiru to’o setembru tinan ne’e.

“Ami rejista pasiente moras ISPA ho númeru a’as mai halo tratamentu iha fasilidade postu saúde, enkuantu moras seluk ho númeru kiik hanesan diareia, kulit katar no ipertensaun,” Médiku hosi postu saúde Uaimori, Marcelino da Silva, informa iha ninia knaar fatin, segunda ne’e.

Tuir pesoál saúde, pasiente sira sofre moras ISPA tanba fatór barak.

“Kazu ISPA rejista ho númeru a’as tanba kestaun ijiene, ambientál no difikuldade seluk hanesan menus bee-moos, komunidade kuru bee mota hodi konsumu no haris hodi afeta ba kabun moras no isin katar,” nia hato’o.

Notísia relevante : Postu saúde Ratahau Viqueque rejista moras ISPA hamutuk 500

Nune’e, bainhira pasiente sira mai halo tratamentu, pesoál saúde sempre oferese ai-moruk.

“Ami-nia stock aimoruk tuir nesesidade, parasetamol no amoxilin sai esensiál, nune’e bainhira stoke menus ami tenke informa ba sentru saúde Viqueque, maibé distánsia mak dook ne’ebé dalaruma liu semana ida ka rua maka foin to’o, nune’e mós ami menus rekursu farmásia,” nia akresenta.

Tuir dadus, sentru saúde Uaimori hahú janeiru to’o setembru rejista moras isin katar 90, diareia 90, ulun moras no kotuk laran moras 100, ipertensaun lima no iha tinan 2022 to’o 2023 rejista pasiente pozitivu tuberkoze hamutuk 19, ne’ebé balun ramata ona halo tratamentu no balun iha faze tratamentu.

Sentru saúde ne’e akumula médiku ida, parteira ida, enfermeiru rua, inklui saúde públiku ida.

Jornalista     : Vitorino Lopes da Costa
Editora          : Julia Chatarina

iklan
iklan

Leave a Reply

iklan
error: Content is protected !!