BOBONARO, 15 dezembru 2023 (TATOLI) – Ekipa hosi Diresaun Jerál Komérsiu, Diresaun Nasionál Regulalasaun Komersiál no Protesaun Konsumidór hosi Ministériu Komérsiu no Indústria (MCI, sigla portugés), identifika empreza Xinés ‘Yangfa’ iha postu administrativu Maliana, munisípiu Bobonaro, tenta rai subar fós subsídiu hosi governu ho marka Beruang Merah no Amor de Família ne’ebé empreza importador Perissos no Kreati Furak fa’an ho folin baratu ba merkadu.
Foos hirak-ne’e la hasai iha loza-oin, maibé rai hela iha armazein laran mak ekipa identifika liuhosi atividade monitorizasaun no fiskalizasaun ba sirkulasaun foos subsidiu ne’ebé governu faan ba empreza timoroan sira.
Hiliário Cabral nu’udar tékniku hosi Diresaun Nasionál Regulalasaun Komersiál no Protesaun Konsumidór hosi MCI, informa, tuir dadus hosi empreza importadór katak empreza xineza refere hola de’it foos saka 100, maibé liuhosi entrevista ne’ebé ekipa halo, na’in ba empreza deklara katak sira sosa hamutuk kuantidade saka 2,400, balu sosa tutan hosi empreza lokál timoroan ida.
Maibé bazea ba informasaun ne’ebé pontu fokál MCI iha Maliana ho ekipa Provedoria Direitu Umanu no Justisa (PDHJ) rekolla, foos subsídiu ho marka rua ne’e iha loja refere fáan sa’e liu fali presu normál.
Notísia relevante: Estoke mamuk, empreza importadór Alfa Dili-Lisun seidauk fa’an foos subsídiu
“Horisehik ami mai, ami husu foos Beruang Merah ho Amor de Família iha-ne’ebé, sira hatán hotu tiha, laiha tiha ona, ohin ami mai fali sira dehan foos laiha nafatin. Ha’u dehan armazein iha ne’ebé, entaun ami tama mai iha armazein, ami hetan, ami sura kuaze foos Amor de família sei iha saka 199, ami hatete sé bele hasai ba li’ur, nune’e povu sira bele hola ho presu $13, entaun hasai ba hotu-hotu hola to’o agora,” Hiliário Cabral ko’alia iha Maliana, sesta ne’e.
Nia subliña, liuhosi informasaun ne’ebé ekipa Diresaun Nasionál Regulasaun Komersiál no Protesaun Konsumidór rekolla, katak empreza ne’e rai foos subar iha armazein laran ho razaun atu fa’an ida-ida.
“Depende informasaun sira dehan, ami la’ós subar, maibé ami lakohi ema mai hola barak kedas, ne’ebé ami hakarak fa’an ida-ida, ninia razaun ne’e bele fundamenta oinoin, maibé tuir ha’u-nia interpretasaun se nia rai hela iha armazein laran kleur ,nia atu halo espkulasaun presu, tanba ema kompañia ,nia bele troka karon sira, tau fali karon seluk, tanba foos marka rua dei’t mak kona subsídiu, entaun nia bele troka ho presu aas halo ita-nia konsumidór sira labele hola,” nia katak.
Tékniku hosi MCI ne’e sei hato’o relatóriu ba instituisaun kompetente atu halo investigasaun ba empreza refere.
“Nia kona dekretu lei númeru 29 kona-bá presu justu, ida fali tanba nia rai iha armazein kleur. Signifika nia atu halo espekulasaun ba presu ne’e kona lei ida asaun barkamentu nian, entaun sé nia halo ida-ne’e nafatin, ita sei lori kazu ida-ne’e ba oin, prosesa nia, tanba tuir loloos nia ema Xina, nia laiha direitu atu sosa subsídiu ne’ebé governu fa’an ba importadór timoroan,” nia katak.
Ligadu ba kestaun ne’e Jornalista sira tenka husu razaun hosi kompañia refere, maibé na’in ba kompañia Yangfa laiha fatin.
komunidade suku Ritabou, Domingos dos Santos, sente kontente ho prezensa MCI tanba bele normaliza fali folin foos iha loza ne’e.
“Ami bainbain ne’e biasa hola foos kilograma 25 ne’e ho folin $17 ou $18, agora folin tún ona ba $13, ida-ne’e ami sente kmaan oituna,” nia dehan.
Tuir observasaun Jornalista Tatoli iha terrenu nota katak, hafoin ekipa MCI halo intervensaun komunidade sira entuziasmu ba loja Yangfa hodi hola foos ne’e.
Notísia relevante: Governu sei halo intervensaun foos importasaun iha semana oin
Jornalista: Sérgio da Cruz
Editór: Evaristo Soares Martins
