Top

OJE 2024: MOP prioriza dijitaliza sistema solusiona problema ahí mate-lakan

Ministru Obra Públika, Samuel Marçal. Imajen Tatoli/António Daciparu

DILI, 15 dezembru 2023 (TATOLI)—Ministru Obras Públika (MOP), Samuel Marçal, hateten iha proposta Orsamentu Jerál Estadu 2024 ne’e ministériu tau ona prioridade atu halo dizitalizasaun ba sistema manuál hodi solusiona probelma ahí mate-lakan.

“Dalaruma husu tanba sa mak transferénsia boot loos ba eletrisidade no balun kestiona nusa mak ahí mate bebe’ik. Hau atu informa de’it iha uma fukun ida-ne’e katak, ita iha tinan oin tanba ita iha problema durante ne’e eletrisidade sei la’o hela ho sistema manuál. Ha’u haree no akompaña tékniku sira dalaruma la’o ba tuir ai-riin ba leno tutuir fiu kanek ruma iha ne’ebé. Tanba ne’e mak ita tau osan ba ne’e no ba tinan oin hahú prosesu aprovizionamentu para ita komesa ona ho buat ida dijitalizasaun,” Ministru ne’e hato’o liuhosi intervensaun iha debate ba proposta OJE 2024 faze espesialidade ba loron daruak iha uma fukun PN, sesta ne’e.

Iha parte seluk, Deputada KHUNTO Olinda Guterres husu MOP tau atensaun estrada sira iha territóriu hodi fasilita povu sira lori produtu asesu ba merkadu.

Deputadu FRETILIN, Antoninho Bianco, rekomenda ba ministériu atu koopera ho universidade sira iha rai-laran hodi redús asesór sira mai hosi rai-li’ur.

Deputada CNRT, Maria Barreto, rekomenda ba MOP katak iha 2024 atu hare ba infraestrutura ne’ebé asesivel ba ema ho defisiénsia liuliu iha fatin trotoar sira.

Deputadu CNRT, Natalino dos Sants, husu ministériu atu fó solusaun ba projetu emerjénsia 144 ne’ebé to’o agora seidauk hetan pagamentu no husu atu solusiona mós funsionáriu Guarda Lorosa’e.

Liuhosi debate proposta OJE 2024 faze espesialidade ne’e, PN mós aprova proposta OJE 2024 ba Ministériu Obra Públika (MOP) hamutuk $224.279.372 ho votu a-favór 49, kontra tolu (3) no abstensaun 13.

“Ne’ebé orsamentu ba MOP pasa,” Prezidente Parlamentu Nasionál, Maria Fernanda Lay, hateten iha sala plenária.

Hosi $224.279.372 aloka ba saláriu vensimentu $9.187.551, bens no serbisu $21.802.827, transferénsia públika $155.000.000, kapitál menór $198.400 no kapitál dezenvolvimentu $38.090.594.

Hosi orsamentu ne’e aloka ba programa estrada no ponte $51.515.032, programa dezevolvimentu rurál no urbanu $2.804.340, programa funsionamentu no dezenvolvimentu instituisionál $13.611.520, programa agua no saneamentu $6.588.680, programa eletrisidade $149.118.800, programa laboratóriu no infraestrutura $641.000.

Tuir dokumentu livru proposta-lei OJE 2024 planu asaun anuál ba MOP tau prioridade ba programa neen (6) mak hanesan programa estrada no ponte ho ninia sub-programa infraestrutura estrada, ponte no kontrolu cheias ho atividade 12, sub-programa investe iha planeamentu, atualizasaun, manutensaun no regulamentasaun rede rodaviáriu ho atividade rua.

Programa dezenvolvimentu rurál no urbanu ho ninia sub-programa estabelese no aplika kontrola konstrusaun ho atividade tolu, sub-programa dezenvolve polítika planeamentu urbanu ho atividade tolu, sub-programa melora abitasaun nasionál ho atividade haat (4).

Progama funsionamentu no dezenvolvimentu instituisionál ho sub-programa rua (4) no nia atividade hamutuk 15.

Programa água no saneamentu ho nia sub-progama dezenvolvimentu no manutensaun sistema abastesimentu bee iha área rurál no urbanu ho atividade mak rua (2), sub-programa jestaun saneamentu ho atividade rua, sub-programa regulasaun jestaun ba rekursu hídriku no abastesimentu bee iha área rurál no urbanu ho nia atividade neen (6).

Programa eletrisidade ho nia sub-programa apoiu destinadu peskiza no regulasaun atividade elétrika ho atividade tolu, sub-programa enérjia elétrika oras 24 ho atividade ida (1).

Programa laboratóriu infraestrutura ho sub-programa dezenvolve apoiu norma téknika no teste ba konstrusaun no enjenária sívil ho atividade haat, sub-programa kontrola kualidade konstrusaun sívil no obra públika.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!