DILI, 15 dezembru 2023 (TATOLI) – Orsamentu Jerál Estadu 2024 ba Ministériu Ensinu Superiór, Siénsia no Kultura (MESSK) hamutuk millaun $9,1 aprova ona iha debate espesialidade ho votus afavór 54, kontra rua, abstensaun sia.
Verba ne’e fahe ba kategoria sira maka hanesan saláriu no vensimenu millaun $ 2,4, bens no servisu $1,5, transferénsia públika $5,2, kapitál menór rihun $117 no kapitál dezenvovimentu zero.
Orsamentu ne’e sei ezekuta ba programa prioridade rua ne’ebé ministériu trasa ona maka funsionamentu no dezenvolvimenu insitusionál ne’ebé aloka millaun $1,9 no edukasaun no formasaun ba universidade sira prevee millaun $7,3.
Ministru Ensinu Superiór, Siénsia no Kultura, José Honório Jerónimo, promete katak ho orsamentu ne’ebé maka pasa ona ministériu sei haka’as aan hodi serbisu tuir programa ne’ebé maka trasa atubele aposta ba kualidade instituisaun ensinu superiór públiku no privadu (IESPP) sira iha Timor-Leste.
“Ami esforsu atu garante kualidade iha instituisaun ensinu superiór públiku no privadu sira tuir ekipa komisaun ne’ebé maka kria ona atubele kontrola serbisu sira ne’ebé maka hala’o iha institusaun nia laran inklui mos iha ensinu superiór”, José Honório hatete ba Tatoli, iha Parlamentu Nasionál, ohin.
Nia salienta katak papél husi komisaun koordenadora ensinu superiór nian ne’e sei serbisu ho rigór, signifika komisaun ne’e sei tun bá IESPP sira atu observa kondisaun depois ko’alia ho estrutura universidade sira no aprezanta proposta ba ministru no kontinua ba primeiru-ministru hodi hetan aprovasaun atu responde nesesidade estudante sira-nian iha kada universidade.
Jornalista: Tomé Amado
Editora: Maria Auxiliadora
