iklan

POLÍTIKA

PN aprova millaun $57-resin ba MPRM

PN aprova millaun $57-resin ba MPRM

Osan Dollar Amerikanu. Imajen/Espesiál

DILI, 15 dezembru 2023 (TATOLI)—Parlamentu Nasionál (PN), sesta ne’e, aprova proposta Orsamentu Jerál Estadu (OJE) tinan fikál 2024 ba Ministériu Petróleu no Rekursu Minerál (MPRM) hamututk $57.579.359 ho votu a-favór 42, kontra 14 no abstensaun sia (9).

“Hodi nune’e, orsamentu ba Ministériu Petróleu no Rekursu Minerál aaprova,” Prezidente Parlamentu Nasionál, Maria Feranda Lay, hateten liuhusi debate ba proposta OJE 2024 iha faze espesialidade ba loron daruak iha sala plenária PN.

Orsamentu ba MPRM iha porpostta-lei OJE 2024 hamutuk $57.579.359 ne’e aloka ba saláriu vensimentu $5.098.132, bens no serbisu $25.981.227, tansferénsia públika $26.500.000, kapitál menór ho transferénsia públika laiha.

Hosi orsamentu ne’e aloka ba progama funsionamentu dezenvolvimentu instituisionál $5.683.307, programa dezenvolvimentu kampu Gás Greater Sunrise no asegura gazodutu mai Timor-Leste $12.242.963.

Programa dezenvolve polítika no boas prátika iha indústria hodi asegura partisipasaun máxima iha atividade setór $28.626.614, programa implementasaun projetu Tasi Mane iha Kosta Sul $10.396.116 no programa explora, investiga no dezenvolve rekrusu petrolíferu, minerál no jeolójíku iha territóriu $630.359.

Durante diskusaun Deputadu hosi bankada Governu aprezenta proposta ida-ne’ebé pasa iha plenária, kona-ba orsamentu ba MPRM dentru programa implementasaun projetu Tasi Mane iha Kosta Súl alterasaun entre kategória bens serbisu ba kapitál menór rihun $250 ba rekezisaun ekipamentu informátika no coube house ba tékniku sira ba projetu implementasaun Kosta Súl programa IX Governu hosi MPRM.

Antes ne’e, Ministru Petróliu no Rekursu Minerál (MPRM), Francisco Monteiro, hateten iha proposta Orsamentu Jerál Estadu (OJE) 2024 ministériu prioriza dahuluk mak programa dezenvolvimentu kampu gás Greater Sunrise no asegura gasoduto dada mai Timor-Leste.

Ministériu Petróleu no Rekursu Minerál iha proposta OJE 2024 prevee ho montante $57.579.359 no hosi orsamentu ne’e sei distribui hosi ministériu nian no mós ba entidade tutela nian hodi bele ezekuta programa prioridade lubun ida-ne’ebé mak ministériu define ona.

“Programa sira ne’e dahuluk mak negosiasaun ba Greater Sunrise nian atu dada kadoras mai  Timor-Leste, ne’ebé  ho sub programa prinsipál mak negosiasaun no dezenvolve estudu inisiativa relevante hodi asegura gasoduto  Greater Sunrise no kampu sira seluk mai Timor-Leste. Depois sub-programa tuir mak dezenvolvimentu polítika no lejislasaun no regulamentu setór, apoiu fortifika instuisaun tutela no sub-programa sira seluk tan,” ministru ne’e hateten

Programa seluk mak dezenvolvimentu implementasaun projetu Tasi-Mane iha Kosta Súl, ne’e sei envolve projeitu fíziku lubun ida maibé ida prinsipál iha 2024 mak rua ida Suai Supplay Base ne’ebé tinan barak uluk tenta ou avansa ona to’o hetan kontratu ida.

Maibé, depois iha indepedimentu balun lori TL atrazu to’o ohin loron, Governu lihusi Ministériu Petróleu no Rekursu Minerál ho konsultasaun ho Primeiru-Ministru, tanba temi mós iha ne’e katak serbisu hotu-hotu liuliu relasiona ho negosiasaun ba kampu Greater Sunrise, Suai Supplay Base, Tasi-Mane.

Iha tinan oin, ida-ne’e sai mós programa importante ida ba Suai Supplay Baze, hakarak atu komesa daudaun ona konstrusaun Supplay Base iha tinan oin.

Tanba ne’e, sei iha relasaun ho kestaun dada kadoras mai Timor-Leste, ho objetivu atu desizaun dada kadoras mai TL ho negosiasaun sira-ne’ebé hahú daudaun ona sei intenfika iha 2024, iha meadu ka fim 2024 ne e, tenke halo ona desizaun konseitu úniku ba dezenvolve ba Greater Sunrise.

“Se ita halo desizaun iha 2024, konstrusaun em si, plataforma, plant LNG, referenária, petrokímika ne’ebé sei relasaun ho ida ne’eba ne’e sei akontese de’it iha fim 2026 ou inísia 2026. Atu ita bele dezenvolve greater sunrise ne’e ho di’ak, ita presiza Suai Supplay Base ne’e konstruidu no operasionaliza tiha ona antes 2027. Tanba ne’e mak ami hosi parte Governu deside liuhosi MPRM deside liuhosi konsultasaun ho Primeiru-Ministru,” nia hateten.

Tanba, time line dezenvolvimentu ba Greater Sunrise entermu konstrusaun iha 2027, entaun TL nia Suai Supplay Base hotu iha fin 2026 ou mais tarde inísiu 2027.

“Tuir mai iha kontexu Tasi-Mane iha mós projetu ida auto estrada ne’ebé uluk hahú tiha ona hosi Suai ba Zumalai, agora ita presiza tan ba to’o Natarbora. Ne’e mós ami hatama hanesan programa prioridade ida iha 2024, klaru sei la to’o iha 2024 de’it maibé hanesan temi antes 2027 di’ak liu Suai Supplay Base ho auto estrada tenke hotu ona,” nia dehan,

Programa seluk tan mak explora investiga no dezenvolve rekursu petrolíferu, minerál no jeolójiku iha territóriu, ne’e liga ho hanesan iha kontextu agora haree hela katak rendimentu setór petrolíferu nian ba Estadu rasik tun ba dadaun ona.

Liuliu, nia hateten, fundu petrolíferu ne’ebé agora sustenta hela nasaun nia balansu mós agora depedente loos ba investimentu fundu ne’e rasik, maibé entermu produsaun petroleu nota hela tun ba daudaun, iha fim tinan ne’e ou inísiu tinan oin iha posibilidade kompañia sira sei deside atu para ona operasaun ka produsaun iha ne’eba.

“Entaun importante tebes ita explora no investiga alternativu oioin seluk ne’e inklui iha rai-maran no tasi-laran no mós iha petroleu no minerál ninian, ne’e mós sai programa importante iha ministériu nian iha 2024,” nia hateten.

Enkuantu programa seluk hosi MPRM mak funsionamentu no dezenvolvimentu instituisionál ne’e.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!