PN aprova proposta OJE 2024 ba MACLN

DILI, 16 dezembru 2023 (TATOLI)– Parlamentu Nasionál (PN), sesta ne’e, aprova Orsamentu Jerál Estadu (OJE) 2024 hamutuk ba Ministériu Asuntu Kombatente Libertasaun Nasionál (MACLN, sigla Portugés), ho votu a-favór 59, kontra zero no abstensaun neen (6).
“Orsamentu Jerál Estadu Ministériu Asuntu Kombatente Libertasaun Nasionál pasa iha espesialidade,” Prezidente Parlamentu Nasionál, Fernanda Maria Lay, hateten iha diskusaun OJE 2024 iha faze espesialidade ba loron daruak iha plenária PN.
Orsamentu ba MACLN ba tinan 2024 ho montante $113.010,076 ne’e aloka ba saláriu vensimentu $1.881,272, bens servisu korrente $6.578.836, tranférensia públika $100.853,776, kapitál menór $212.090 no kapitál dezenvolvimentu $3.484.10.
Ministru Gil da Costa Monteiro “Oan Soru” hateten, iha tinan 2024 ne’e MACLN kontinua halo levantamentu dadus ba ema-ne’ebé mate iha funu laran durante iha períodu funu 1974-1999 iha territóriu nasionál.
“Iha 2024 nian mak ami sei hala’o levantamentu no halo verifikasaun ba ema ne’ebé mate iha territóriu laran ho dala ida de’it. Tanba dadus ne’ebé mak hosi uma-lisan kuaze 1% mak ami seidauk foti no ami sei foti hotu iha 2024,” nia dehan.
Jornalista : Osória Marques
Editór : Cancio Ximenes

