VIQUEQUE, 15 dezembru 2023 (TATOLI)—Komandante Polísia Nasionál Timor-Leste (PNTL) munisípiu Viqueque, Superentendente, João da Costa, apela ba joven sira atu labele halo barullu iha tempu natál.
“Ami apela ba joven hotu-hotu iha munisípiu Viqueque tenke hakmatek no prevene-an hosi konflitu iha tempu natál ne’e atu abitante sira seluk bele moris hakmatek hodi festeza natál no simu tinan foun ho família sira ho ksolok nia laran. Labele iha tristeza tanba oras ne’e ema barak moris livre.,” João da Costa, hateten ba Agência Tatoli, iha ninia knaar fatin, iha postu Viqueque Vila, sesta ne’e.
Notísia relevante : PNTL Viqueque rejista krime rua durante eleisaun órgaun suku segunda volta
Nia hato’o lia hirak ne’e tanba nota katak iha loron ikus ne’e joven sira tuda malu beibeik iha postu Viqueque Vila, nune’e nia husu joven sira tenke prepevene-an hosi hahalok ne’e.
Tuir Komandante Polísia, membru sira daudaun halo preparasaun seguransa ba loron boot atu ema hotu bele sente livre.
“Ami halo ona preparasaun seguransa ba loron natál no simu tinan foun tanba ema hotu hakarak moris hakmatek no livre, maibé bainhira hahalok grupu ki’ik pertuba orden públiku, ami sei la husik no sei kombate hahalok sira-ne’ebé viola orden públiku, atu kalan ka loron ami sei buka tuir,” nia afirma.
Komandante ne’e husu ba Autoridade no abitante lokál sira atu serbisu hamutuk ho PNTL asegura munisípiu Viqueque hodi ema hotu bele moris hakmatek.
“Tenke asegura pás iha munisípiu, suku aldeia no bairru sira atu ita hotu bele moris haksolok simu Jesus nia moris ho pás no estabilidade,” nia apela.
Tuir dadus membru PNTL efetivu hamutuk na’in-139 destakadu iha munisípiu Viqueque Eskuadra lima iha Uatucarbau, Uatulari, Lacluta, Viqueque Vila no Ossu sei fó seguransa iha ámbitu natál no tinan foun.
Jornalista : Vitorino Lopes da Costa
Editora : Julia Chatarina
