DILI, 15 dezembru 2023 (TATOLI) – Prezidente Repúblika, Jose Ramos Horta, hateten estudante pre-primaria husi Organizasaun Naun Govermentál Lalenok ba Ema Hotu (LABEH) fó kualidade edukasaun di’ak ba estudante sira.
“Durante ne’e LABEH fó ona edukasaun kualidade ba estudante pre-eskolar sira, tanba ne’e mak ohin fó tan graduasaun ba labarik sira hamutuk 28, sira sai matenek ita haree sira-nia linguajen inglés ne’ebé mak di’ak liu fali ema boot sira”, Jose Ramos Horta informa ba jornalista sira bainhira partisipa graduasaun ba estudante nivel pre-primaria iha salaun katedral, ohin.
Xefe Estadu agradese ba Diretór LABEH ho nia ekipa sira ne’ebé mak fó ona matenek uitoan ba labarik sira ne’ebé halao estudu iha sira-nia fatin.
“Eskola la fó hahan ba labarik sira, maibé família mak tenke responsabiliza tanba eskola ne’e orsamentu la iha. Entaun ha’u sei haree ba sira-nia hahan atu tein extra ba labarik sira iha LABEH tanba sira iha kualidade ne’ebé mak di’ak”, nia afirma.
Diretór Ezekutivu Lalenok Ba Ema Hotu (LABEH),Crhistopher Henry Samson, hateten ohin Lalenok ba Ema Hotu fó graduasaun dala-ualu ba estudante sira ne’ebé mak liu ona prosesu tomak no estabiliza iha LABEH.
“Estudante sira ne’ebé mak ohin gradua hamutuk 28, sira ne’e matenek no ko’alia inglés, portugés no tetun, entaun husi susesu ida-ne’e mak ita selebra liuhosi graduasaun no ita konsegue halo mudansa ba sira no ita konsege halo sira fokus ba edukasaun ba aban bainrua”, Crhistopher Henry Samson esplika.
Dezde 2016, LABEH fó ona graduasaun ba estudante pre-primaria sira hamutuk 385”, nia konklui.
Jornalista : Felicidade Ximenes
Editór : Zezito Silva
