DILI, 15 dezembru 2023 (TATOLI) – Prezidente Repúblika (PR), José Manuel Ramos Horta, argumenta, nia parte iha kompeténsia própria fó indultu ba kondenada Emília Pires (eis Ministra Finansa) no Madalena Hanjam (eis-Vise Ministra Saúde).
Xefe Estadu respeita Juis sira halo desizaun, maibé Prezidente Repúblika ho desizaun ne’e ho mandatu konstituisionál artigu 85 no Lei númeru 20 /2023, 12 dezembru kona-ba Prosedimentu Konsesaun Indultu no Komuntasaun ba Pena.
“Fó podér polítiku ba Prezidente halo desizaun ba indultu. Tanba ne’e razaun umanitáriu no tanba tempu naruk loos ona ema ne’e sofre lubuk ida, lakon osan tinan 10 la servisu, lakon buat hotu-hotu, emosionalmente, nia dignidade sai umilladu. Ha’u fiar nia inosente, no ha’u nu’udar ema no nu’udar Prezidente ha’u pudia hateten ha’u laliga ba ida-ne’e, ha’u nonok hela”, Xefe Estadu hateten liuhosi konferénsia imprensa, iha Palásiu Prezidensiál, Bairru-Pité, sesta ne’e.
Xefe Estadu dehan, konkretamente indultu ne’e fó ba feto na’in-rua, ida mak Emília Pires no Madalena Hanjam.
“Ne’ebé ha’u koñese di’ak, tempu luta iha Austrália nia ho família tomak sempre apoia solidariedade ativu, nia rasik ba to’o Zenebra maibé nia saúde ladi’ak tanba moras no hemu ai-moruk sala, entaun nia la’o susar tebes, maske halo operasaun dala barak. Ita haree kazu umanitáriu ida, maibé depois nia iha li’ur tiha ona, uluk servisu iha Banku Mundiál, iha 2007 mak Xanana Gusmão bolu nia nu’udar Ministra Finansa, nia servisu di’ak loos,” Horta akresenta.
Horta haktuir, durante sai Ministra Finansa nia halo reforma kle’an iha Ministériu Finansa, moderniza sistema finanseira, depois nia mak halo proposta atu aplika Fundu Petrolíferu.
“Ha’u labele permite kazu ida injustisa bele kontinua. Ne’e duni ha’u halo indultu ba Emília Pires no Madalena Hanjam, liuliu Emília Pires iha rai-li’ur atubele fila ba Austrália hodi pasa natál ho família, ema barak lafiar ida-ne’e, no la konkorda karik balun tanba razaun polítika. Sira-ne’ebé la konkorda karik ha’u respeita, desizaun nune’e duni, dala ruma ita halo desizaun laiha konsensu maibé Prezidente Repúblika atu halo desizaun halo tuir konstituisaun, lei no tuir ha’u-nia konsiénsia,” nia salienta.
“Ne’ebé Emilia Pires hakarak mai Timór ka lae, ne’e ninia desizaun”, Horta dehan.
Bainhira husu Emilia ho Madalena seidauk kumpri pena prijaun maibé hetan indultu, Xefe Estadu klarifika, Lei indultu foun klarifika podér Prezidente nian, se lae kazu ida bele arasta tinan 20 nia laran, hein laiha rezultadu.
Prezidente Repúblika foti desizaun ne’e bazea ba Konstituisaun RDTL artigu 85 alinea i katak, rona tuir Governu, atu fó perdaun ka hamenus kastigu.
Nune’e mós indultu ne’e bazea ba Lei númeru 20 /2023, 12 dezembru kona-ba Prosedimentu Konsesaun Indultu no Komuntasaun ba Pena.
Artigu 7 (instrusaun) númeru 1 hosi Lei ne’e hateten, kuandu Prezidente Repúblika deside konsede indultu no komutasaun ba pena, Prezidénsia Repúblika inísia ona prosesu.
Númeru 2 hosi artigu 7 hosi Lei ne’e fundamenta, rekerimentu indultu dirije ba Prezidente Repúblika no tenke akompaña ho desizaun ne’ebé ké hamonu pena ka medida seguransa ka kondenadu.
Nune’e mós desizaun ba indultu ne’e prevista iha artigu 8 (audisaun Governu), artigu 9 (desizaun) no artigu 11 (komunitasaun indultu, komutasaun no ezekusaun).
Purtantu iha loron 07 outubru tinan 2022, Tribunál Distritál Dili (TDD), liuhosi desizaun koletiva juis-nian kondena pena prizaun tinan hitu ba arguida eis Ministra Finansa (MF), Emília Pires, no arguida eis Vise Ministra Saúde (MS) Madalena Hanjan, tinan haat.
Liuhosi prosesu rejulgamentu ba kazu ne’e, Tribunál primeira instánsia kontinua mantein hodi kondena arguida na’in-rua ho pena komarka tanba provadu ba krime partisipasaun ekonómika no negósiu ne’ebé previstu iha artigu 299 númeru 1 kódigu penál ba projetu fornesimentu kama ba Ospitál Nasionál Guido Valadares (HNGV, sigla portugés) liuhosi Ministériu Saúde no absolve krime administrasaun danoza, no aplika mós selu kustu judisiária $200.
Maibé, iha loron 14 fulan-dezembru, Emília Pires no Madalena Hanjam, hetan ona perdaun hosi Prezidente Repúblika, José Manuel Ramos Horta.
Xefe Estadu mós fó-sai katak, desizaun ba indultu ne’e podér polítiku la’ós podér jurídiku, no validade ne’ebé mai hosi Konstituisaun.
Notísia relevante: TDD kondena Emília Pires pena prizaun tinan hitu no Madalena Hanjan tinan haat
Jornalista : Antónia Gusmão
Editór: Evaristo Soares Martins
