DILI, 16 dezembru 2023 (TATOLI)—Empreza Jigante INPEX Corporation Japaun iha interese hametin kooperasaun ho Timor-Leste hodi investe iha setór mina no gás.
Prezidente no Diretór Ezekutivu empreza INPEX Corporation, Takayuki Ueda informa asuntu ne’e durante hala’o enkontru ho Primeiru-Ministru, Kay Rala Xanana Gusmão, ne’ebé akompaña hosi Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Vise-Ministra ba Asuntu ASEAN, Milena Maria da Costa Rangel, hamutuk ho Embaixadór Timor-Leste iha Japaun, Ilídio da Costa Ximenes, iha Otél The Okura Yokyo-Japaun.
Notísia relevante :
INPEX Corporation nu’udar empreza jigante ida iha Japaun ne’ebé iha ona esperiénsia tinan barak hodi hala’o serbisu iha dezenvolvimentu indústria mina no gás no daudaun ne’e hala’o investimentu iha indústria enerjia iha nasaun avansadu.
Prezidente empreza INPEX Corporation, Takayuki Ueda, agradese tebes no sente previlejiu hasoru malu ho Xefe Governu Xanana ho ekipa tanba bele fó oportunidade hodi ko’alia kona-ba futuru dezenvolvimentu mina no gás.
“Ami ekipa hosi INPEX Corporation sente previlejiu tebes no biban ne’e agradese ba oportunidade hodi hasoru malu ho ita boot iha momentu ida-ne’e. INPEX Corporation hanesan empreza Japaun, ne’ebé durante ne’e halo esplorasaun no dezenvolve mina no gás no ida-ne’e foin primeira vez ba empreza hasoru malu ho Primeiru-Ministru,” Takayuki Ueda hateten durante enkontru ho PM Xanana no ekipa, hanesan haktuir iha nota ne’ebé Agência Tatoli asesu, sábadu ne’e.
PM Xanana Gusmão iha biban ne’e hato’o agradese no halo esplikasaun kle’an hodi konvida direta INPEX Corporation atu hala’o vizita mai Timor-Leste hodi haree rasik kondisaun nune’e ba futuru bele investe.
Jornalista : Antónia Gusmão
Editora : Julia Chatarina
