DILI, 16 dezembru 2023 (TATOLI )—Asosiasaun Nasionál Múzika Timor-Leste (ALMAMOR), sábadu ne’e, realiza Kongresu dahaat, ne’ebé momentu ne’e kedan hili estrutura foun lidera asosiasaun ne’ebé hanesan mahon ba k’nanauk-oan sira hodi halibur filafali telentu iha muzika nian.
Ikus mai, kongresista sira hili Filipus Nino Pereira sai Prezidente foun ba ALMAMOR ba períodu tinan-lima, hahú tinan 2023-2028.
Biban ne’e, Prezidente eleitu hateten, durante ninia mandatu, nia parte hamutuk ho estrutura hakarak dezenvolve no halo advokasia di’ak liu tan ba obra artista timor-oan sira liuhosi atividade oin-oin.
“Iha hau nia mandatu, hakarak fortifika estrutura, kria ramu ALMAMOR iha munisípiu, defende no dignifika artistas sira liuhosi formasaun,” Nino Pereira, informa ba Agência Tatoli, iha Universidade Katólika Timorense (UCT, sigla portugés), Balide.
Notísia relevante : Lei kódigu direitu autór sei promove kresimentu ekonomia iha TL
Aleinde ne’e, Prezidente foun hakarak sensibiliza di’ak liután lei Kódigu Direitu Autór no Direitu Konexu, ba ema hotu atu defende diretu autór sira iha rai-laran.
Estrutura foun hakarak mós hamosu programa interkámbiu artista nasionál no internasionál sira.
Iha biban hanesan, Prezidente ALMAMOR sesante, Henrique dos Santos, husu estrutura foun atu asegura obra artista sira hotu iha asosiasaun tamba daudaun ne’e iha ona lei ne’ebé bele reforsa atividade sira.
“Tenke reajusta hotu atubele hatene kuandu iha violasaun ruma ba obra artista sira, atu nune’e bele halo advokasia,” nia rekomenda.
Henrique dos Santos sujere ba estrutura foun atu aproxima Governu hodi promove artista sira iha eventu nasionál sira liuhosi selesaun ALMAMOR nian.
Aleinde ne’e, husu mós Prezidente foun asosiasaun atu servisu di’ak liután ho setór privadu hodi promove artista sira.
Jornalista : Jesuína Xavier
Editora : Julia Chatarina
