Governu tenke avalia operadór telekomunikasaun Timor Telecom-Telemor-Telkomcel
DILI, 19 dezembru 2023 (TATOLI)—Diretór Ezekutivu FONGTIL, Valentim da Costa Pinto, hateten Governu tenke halo avaliasaun ba operadór telekomunikasaun hanesan Timor telecom, Telemor no Telkomcel ne’ebé mak eziste iha Timor-Leste.
“Governu presiza no tenke avalia operadór telekomunikasaun tolu ne’ebé eziste iha Timor-Leste. Kuandu la ajuda konsumidór sira bele limita nia kontratu, labele halo operasaun iha Timor tanba ida-ne’e prátika hais, nune’e Governu iha autoridade atu salva nia sidadaun sira liuliu konsumidór sira. Operadór sira bainhira mai ho prátika naok ne’e di’ak-liu hapara, lalika halo operasaun iha Timor,” nia dehan ba Agência Tatoli, via telefónika, tersa ne’e.
Nia husu Autoridade Nasionál Komunikasaun (ANC, sigla portugés), bele koordena ho operadór tolu ne’ebé eziste iha Timor atu bele salva konsumidór sira-nia direitu, tanba ema ense pulsa maibé la kle’ur mai pulsa laiha ne’e prátika ida ne’ebé hais ba konsumidór sira.
“Ami lamenta tebe-tebes kona-ba ida-ne’e. ANC presiza tenke halo servisu makaas uitoan. Ami husu tebes ba ANC presiza tenke halo servisu makaas ho operadór telekomunikasaun tolu ne’ebé ezisté iha Timor. Tanba ne’e, iha tendénsia bainhira la’o hanesan ne’e sira hais konsumidór barak liu. Ita bainhira ense pulsa ne’e la la’o maibé ema nia pulsa iha laran hotu kedas,” nia lamenta.
Nia dehan, internet louding maibé han ema-nia pulsa tiha ona maibé ema la asesu internet ho di’ak ne’e prátika ida foti konsumidór nia direitu.
Peskizadór Asia Justice And Rights (AJAR), Inocêncio Xavier, hateten ministériu ida tau matan ba ida-ne’e tenke fó atensaun másimu, loron ba loron operadór tolu ne’e halo monopolu, halo velosidade internet ne’e paradu totál.
“Ita ense pulsa mós pulsa hotu de’it maibé rezultadu laiha. Ha’u hanoin ANC labele matan dukur demais. Estadu gasta osan ba sira depois sira la halo buat ida. ANC tenke obriga operadór sira ne’e kumpri sira obrigasaun tuir lisensa sira-ne’ebé hato’o ona,” nia dehan.
Jornalista : Osória Marques
Editór : Cancio Ximenes
