DILI, 17 Dezembru 2023 (TATOLI) – Primeiru-Ministru Japaun, Kishida Fumio, liuhosi jantár konfraternizasaun iha State Guest House, Palásiu Akasaka, dehan nasaun membru hosi Asosiasaun Nasaun Sudeste Aziátiku (ASEAN, sigla inglés) no Japaun hakarak alkansa maka tenke iha dame no prosperiedade ba povu no nasaun membru ASEAN tomak.
Xefe Governu Japaun hato’o asuntu ne’e ba Xefe Estadu no Xefe Governu, iha jantar amizade iha ne’ebé partisipa hosi Primeiru-Ministru, Kay Rala Xanana Gusmão no Sekretáriu Jerál ASEAN, Kua Kim Hourn no mós lider ASEAN ho espoza sira, iha ámbitu konferénsia nivel aas hodi komemora tinan 50 kooperasaun ASEAN-Japaun.
‘’Diskursu abertura ne’e mós refelta ba envolvimentu husi Xefe Governu antesesór sira iha tinan 50 ikus ne’e no tenik katak xavi husi relasaun entre ASEAN no Japaun mak fiar malu, katak iha momentu krize komplexu, Japaun no ASEAN hetan solusaun husi konfiansa forte no buras hodi sai hanesan parseiru ho objetivu atu kria sosiedade no ekonomia, ne’ebé ba kamada sosiedade hotu nia moris no alkansa moris husi sosiedade klase méediu. Saida mak Japaun no ASEAN hakarak alkansa mak dame no prosperiedade’’, Xefe Governu Japaun hateten liuhosi nota informative ne’ebé Agência Tatoli asesu, domingu ne’e.
Kishida Fumio garante katak kriasaun konjunta, espansaun ekonomia no mós sosiedade ne’ebé di’ak liu, sei kontribui no garante kriasaun mundu ne’ebé mak livre no nakloke, bazeia ba supermasia lei.
Primeiru-Ministru Japaun mós husu ba lideransa ASEAN sira atu bele hato’o ba mundu, vizaun ba futuru ne’ebé bele sólidu iha jerasaun tuir mai, hodi selebra konferénsia nivel aas iha futuru.
Iha ámbitu ne’e, hatudu demostrasaun drum tradisionál Japaun nian no hatudu maneira oinsá halo sushi, no hahán tradisionál ne’ebé famozu iha Japaun, no mós kapasidade subestikada ho forma tardisionál hodi halo rabixadu ‘Amezaiku’ ne’ebé hato’o hanesan prezente ba líder ASEAN sira.
Jornalista: Antónia Gusmão
Editór : Zezito Silva
