DILI,17 dezembru 2023 (TATOLI) – Ministériu Edukasaun (ME) aloka, iha tinan oin, rihun $45-resin ba implementasaun Programa Saúde Sexual no Reprodutiva iha eskola sekundária sira, nune’e alunu sira bele hatene kauza husi isin-rua sedu.
Deputada husi bankada Partidu Libertasaun Populár (PLP), Maria Angelina Sarmento, hatete programa ne’e di’ak tanba atu ajuda joven sira, liuliu labarik feto sira iha eskola sekundária atu komprende didi’ak hodi bele kuída sira-nian aan labele hetan hetan sira ne’ebé maka afeta ba sira-ninia aan hodi prejudika fali futuru.
“Programa ne’e di’ak tebes maibé ninia orsamentu aloka ne’e maka kuaze rihun $45-resin de’it. Hanesan bankada opozisaun konsidera orsamentu ne’e ki’ik liu, tanba ne’e, ministra Dulce presiza halo esplikasaun atu membru Parlamentu Nasionál bele hatene osan ho montante ki’ik ne’e atu halo saida”, Maria Angelina kestiona iha debate OJE 2024 iha faze espesialidade, sesta-feira ne’e.
Deputada ne’e salienta katak hanoin di’ak husi ME ninia esforsu ba programa ne’e hakarak atu tau-matan ba kondisaun joven sira-nian, tanba daudaun ne’e foinsa’e, liuliu feto sira maka isin-rua sedu no sira barak mak lakon oportunidade atu kontinua estudu.
Nune’e, liuhusi esforsu ne’ebé ME halo bele fó atensaun ba labarik feto sira iha eskola sekundária hotu atu evita sira-nian aan hodi labele monu ba risku sira no bele garante futuru ida naroman hodi bele hakat liután bá oin.
Ministra Edukasaun, Dulce de Jesus, responde ba preokupasaun deputada Maria Angelina Sarmento katak alokasaun verba ba programa ne’e ki’ik, maibé ministériu sei asegura koezaun sosiál através edukasaun.
Nia salienta katak ME sei responde ba polítika atu garante inkluzividade ba atividade estrakurrikulár ida iha eskola sekundáriu jerál hotu iha Timor-Leste atu fó oportunidade ba estudante feto sira hodi bele sai líder iha atividade konsellu estudantíl, nune’e bele halo reflesaun ida ba atividade estra kona-ba saúde reprodutiva ne’e rasik.
“Nasaun ne’e mós ninia dezenvolvimentu sura ho feto sira-ninia kontribuisaun, tan ne’e nu’udar líder iha ministériu ne’e hakarak hatuur importánsia ba atividade ne’e atu akompaña labarik feto sira iha eskola sekundária hodi sira labele lakon oportunidade hodi kontinua estuda”, afirma.
Notísia relevante: Formasaun kona-ba saúde reprodutiva ba alunu sira atu hadook-aan husi kaben sedu
Jornalista: Tomé Amado
Editora: Maria Auxiliadora
