DILI, 17 dezembru 2023 (TATOLI) – Primeiru-Ministru, Kay Rala Xanana Gusmão, domingu ne’e, enkontru ho Eis Embaixadór no Honoráriu Konsul Jerál Timor-Leste ba Japaun, Iwao Kitahara no Profesór Yamada Yutsuya hodi diskute kooperasaun servisu.
“Iwao Kitahara no Profesór Yamada Yutsuya hosi Universidade Waseda Japaun nu’udar belun di’ak ba PM Xanana no nasaun no povu Timor-Leste, tanba ema na’in rua ne’e mós fó sira kontribuisaun ba prosesu kontrusaun Estadu Timor-Leste”, haktuir nota ne’ebé Agência Tatoli asesu.
Iha enkontru amizade ne’e, Xanana ho nia belun di’ak sira diskute liu kona-ba prosesu dezenvolvimentu Timor-Leste nian ne’ebé la’o daudaun, presiza tebes atu hetan apoiu hosi parseiru dezenvolvimentu sira iha rekursu umanu Timor-Leste hodi prepara aan di’ak liután.
Xefe Governu Xanana agradese tebes ba entidade nain rua ninia apoiu ba servisu hotu ne’ebé sira oferese hodi apoia dezenvolvimentu Timor-Leste.
Eis Embaixadór Japaun ba Timor-Leste, Iwao Kitahara, haktuir Governu Timor-Leste nomea sai nu’udar Honoráriu Konsul Jerál Timor-Leste ba Japaun hodi hala’o servisu promove Timor-Leste iha setór hothotu ba povu Japones sira.
I Wao Kitahara nu’udar pesoál ida iha relasaun forte ho líder Timor-Leste nian hanesan mós pesoál importante ne’ebé iha sosiedade sivil, Japaun ne’ebé bele tulun no ajuda halo konesaun ba setór privadu sira no organizasaun sira seluk, hodi tulun dezenvolvolvimentu ekonomia no indústria iha Timor-Leste liuliu setór turizmu, peska, agrikultura liga ba promosaun kafé Timor-Leste nian no área importante seluk-tán.
Antes enkontru ne’e konklui, entrega prenda agradesimentu hosi Primeiru-Ministru Xanana no Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay.
Jornalista: Antónia Gusmão
Editór : Zezito Silva
