Top

Austrália-PR diskute kooperasaun estratéjiku tulun dezenvolvimentu ekonómiku iha TL

Enkarregádu Negósiu Embaixada Austrália, Caitlin Wilson. Imajen Tatoli/Egas Cristovão

DILI, 18 dezembru 2023 (TATOLI)—Enkarregadu Negósiu Embaixada Austrália, Caitlin Wilson, hateten enkontru ho Prezidente Repúblika, José Ramos Horta, hodi ko’alia kona-ba kooperasaun estratéjiku hodi tulun dezenvolvimentu ekonómiku iha Timor-Leste (TL).

“Ohin, diskute ós ho Xefe Estadu kona-bá kooperasaun estratéjiku sira-ne’ebé bele tulun dezenvolvimentu ekonómiku iha Timor-Leste, nune’e hasa’e kresimentu populasaun nian liuhosi kooperasaun iha seitór agrikultura no turizmu. Ho ida-ne’e, ami kompromete tebes entre Australia no Timor-Leste atu kontinua iha kooperasaun,” Enkaregadu Negósiu Austrália ne’e hateten ba jornalista sira hafoin enkontru ho Xefe Estadu iha Palásiu Prezidensiál Nicolau Lobato, Bairru Pite, segunda ne’e.

Aleinde ne’e, nia dehan, entre Governu Timor-Leste no Austrália tenke presiza halo akordu kooperasaun defeza nian ne’ebé metin.

“Tanba ne’e ami diskute kona-ba akordu kooperasaun defeza nian no mós ko’alia liu kona-ba prioridade dezenvolvimentu nian importante sira, no haree ba eventu boot sira iha tinan oin mai ne’ebé Austrália bele apoia. Ami kontente tebes mai hasoru malu ho Prezidente Repúblika Timor-Leste José Ramos-Horta hodi diskute no hametin kooperasaun bilaterál ne’ebé país rua iha,” nia hateten.

Enkontru ne’e mós diskute no hakle’an liu kona-ba kooperasaun iha area defeza entre Timor-Leste no Austrália.

“Ami kontinua hasoru malu ho Prezidente Repúblika, José Ramos Horta hodi ko’alia kona-ba kooperasaun no ko’alia kona-ba prosesu formál sira hodi ratifika akordu kooperasaun defeza nian. Ida-ne’e asina hosi ita-nia nasaun rua iha 2022 hamutuk ho nasaun seluk,” nia hateten.

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!