DILI, 18 dezembru 2023 (TATOLI)—Sekretaria Estadu Eletrisidade, Agua no Saneamentu hamutuk ho Eletricidade de Timor-Leste, Empreza Públika (EDTL, E.P) foin lalais ne’e bolu ona responsável operadór telekomunikasaun ne’ebé eziste atu organiza kabu fibra ótika iha kapitál Dili.
“Haree katak públiku kestiona tanba fiu sira ne’e kuaze sabraut, entaun ha’u orienta ona EDTL, E.P bolu operadór sira iha área komunikasaun ho sira seluk para normaliza fali sira-nia fiu ne’ebé durante sira instala iha ai-rin EDTL ninian, kuandu fó tempu mak sira la halo tuir maka sei foti medida ruma no ikus maka tenke penaliza,” Santos Noronha, hateten ba Agência Tatoli, iha Parlamentu Nasionál, segunda ne’e.
Nia rekoñese katak seidauk iha baze legál ruma forte hodi regula operadór maibé iha ona koordenasaun ho Ministériu Transporte no Komuniasaun hodi kria lei ruma hodi regula operadór sira.
“Labele kontinua ho situasaun ida daudaun, katak fiu sira ne’e dada sabraut iha dalan sira. Momentu EDTL bolu sira hakarak koopera, maibé dalaruma ezekusaun ne’e mak ladún la’o di’ak, entaun ami haka’as sira atu normaliza maibé to’o agora balun labok-an no barak la kumpre. Kuandu la kumpre maka penaliza, tanba kabu sira ne’ebé sira instala iha posta EDTL, entaun EDTL mak sei foti inisiativa rasik hodi normaliza,” nia tenik.
Notísia relevante : EDTL, E.P bolu atensaun operadór telekomunikasaun hadi’a fiu desorganizadu iha poste eletrisidade
Iha loron 14 dezembru liubá, Komisáriu Ezekutivu Serbisu Korporativu, EDTL, E.P, Júlio de Jesus Goçaves, hala’o enkontru ho Ministériu Obra Públika, Sekretariu Estadu bá Asuntu Toponómia no Organizasaun Urbana, Autoridade Reguladora Telekomunikasaun Autoridade Munisipál, TIC Timor inklui Operadór Telekomunisaun nasioná (Timor Telecom, Telkomcel no Telemor), Metrolink, Sacomtel, Global Net, Ralph Vision, Polísia Nasionál Timor-Leste (PNTL), Programa Nasionál Dezenvolvimentu Suku (PNDS) hodi atualiza informasaun no diskute arendamentu aluga poste eletrisidade ne’ebé dada kabu fibra óptika.
Iha reuniaun ne’e EDTL, E.P fó ultimatu to’o loron 29 dezembru tinan ne’e, atu operadór telekomunikasaun idak-idak halo identifikasaun no melloramentu ba instalasaun kabu fibra ótika iha poste eletrisidade ne’ebé dezorganizadu iha sidade Dili inklui kapitál munisípiu sira tuir padraun ne’ebé estipula ona iha kontratu.
Ba operadór telekomunikasaun sira ne’ebé la kumpre kondisaun hirak ne’e, EDTL, E.P sei aplika sansaun hodi dezliga ka tesi-kotu kabu hirak ne’ebé dezorganizadu, ikus sei hapara kontratu aluga poste eletrisidade.
Asaun hirak ne’e EDTL, E.P halo bazeia ba orientasaun Governu inklui preokupasaun públiku durante ne’e kona-ba kabu hirak ne’ebé dada iha poste eletrisidade nian ho kondisaun tabele no monu iha trotoar leten.
Jornalista : Antónia Gusmão
Editora : Julia Chatarina
