Governu sei finaliza konstrusaun edifísiu STAE Oé-Cusse ne’ebé paradu tinan ualu
OÉ-CUSSE, 18 dezembru 2023 (TATOLI) – Governu liuhosi Ministériu Administrasaun Estatál (MAE), promete sei kontinua kontrusaun edifísiu Sekretariadu Tékniku Administrasaun Eleitorál (STAE) iha Rejiaun Administrativa Espesiál Oé-Cusse Ambeno (RAEOA), ne’ebé paradu dezde 2015 to’o ohin loron.
Notísia relevante: MAE kapasita xefe suku 18 iha Oé-Cusse ba administrasaun no kompeténsia
Ministru Administrasaun Estatál, Tomás do Rosário Cabral, informa, projetu konstrusaun STAE Oé-Cusse, paradu tanba kestaun politiziadu hosi Governu anteriór.
“Edifisiu STAE para hotu, tanba politiza fali edifísiu ne’ebá, projetu atinje ona 75%, pagamentu 35%, ita hakarak politizasaun ida-ne’e, ida-ne’e tenke hatama fali relatóriu ba Konsellu Administrasaun Fundu Infraestrutura (KAFI),” Tomás Cabral ba jornalista sira, hafoin halo vizita, segunda ne’e.
Governante ne’e, informa, projetu ne’e tenke kontinua ba faze finalizasaun iha 16 janeiru 2024, STAE sei halo lansamentu kartaun biometriku, ema hotu tene ba atualiza nia kartaun tanba kartaun tuan sei la-uza, atubele identifika ho sistema, tanba sistema ne’ebé monta iha estranjeiru sei kontrola eleitór sira hosi rai laran.
“Problema polítika, uluk Governu Sentrál nian mai iha Oé-Cusse, dún malu ba mai, ikus mai projetu ne’e abandona, maske atinje ona 75% no Governu selu ona 35%, kompañia abandona projetu ne’e tanba ita la selu tuir volume ne’ebé iha,” nia katak.
Nune’e Governante ne’e, informa, Governu sei la halo ona re-konkursu públika tanba iha tempu badak sei orienta Ajénsia Dezenvolvimentu Nasionál (AND) hamutuk ho Diretór STAE nasionál atu halo levantamentu finál ba faze finalizasaun.
“Sei ita loke konkursu foun, depois nia restu 40% ne’e sé mak atu selu, ita selu ona 35%, sei loke konkursu foun tenke fó fali nia osan, murni halo tiha ona, tanba nia problema difikuldade mak finanseiru, agora ADN tenke mai ho diretór STAE, atubele halo levantamentu finál ida hodi informa osan hira mak presiza atu finaliza obra ne’e,” nia afirma.
Entretantu, Projetu konstrusaun edifisíu STAE Oé-Cusse, lokaliza iha aldeia Sanane, suku Costa, sub-rejiaun Pante Makasar, projetu ne’e hahú ezekuta iha 2015 hosi kompañia Mendit Unipesoál Lda, ho valór kontratu $186,740.58.
Orsamentu ne’e Governu prevee hosi Orsamentu Jerál Estadu (OJE) 2015, no tuir kontratu projetu ne’e tuir loloos kompañia tenke finaliza iha 2018.
Jornalista: Abílio Elo Nini
Editór: Evaristo Soares Martins
