HNGV husu INFPM inspesiona ai-moruk hodi distribui ba fasilidade saúde
DILI, 18 dezembru 2023 (TATOLI) – Diretora Servisu Apoiu Diagnóstiku Therapeútiku, iha Hospitál Nasionál Guido Valadares (HNGV), Mingota da Costa Herculano, husu Institutu Nasionál Farmasia Produtu Medikamentu (INFPM), atu aselera inspesaun ba ai-moruk atu bele distribui ba fasilidade saúde.
“Ita hotu rona informasaun katak ai-moruk semana kotuk tama ona, entaun ami husu ba INFPM atu aselera lalais inspesaun ba ai-moruk atu bele distribui ona ba fasilidade saúde labele hein kleur, tanba pasiente presiza ai-moruk atu halo tratamentu saúde”, Mingota da Costa Herculano informa iha nia kna’ar fatin HNGV, ohin.
Nia husu ba INFPM hodi responde lalais nesesidade HNGV nian, tanba pedidu sira ne’e halo regular no haruka ona ba maibé to’o agora ai-moruk seidauk distribui.
“Ohin dader, ami-nia ekipa nafatin ba INFPM, maibé sei hein inspesaun, espera katak halo lalais tanba moras sei la hein tanba iha fulan ne’e, ita sei feriadu barak, natál tinan no foun, depois iha asidente, aumenta moras mak ita-nia medikamentu la iha nafatin, ita atu fó atendimentu mós ita triste”, nia esplika.
Nia afirma, HNGV kontinua kompra emerjénsia maibé la’os atu responde ba pasiente hotu no la responde ba tempu naruk maibé ida-ne’e loron balun de’it.
“Totál item ai-moruk ne’ebé ita iha HNGV hamutuk 405, husi ne’e ita-nia estoke mamuk hamutuk 64 ka 17%, husi ne’e ai-moruk vitál esensiál no nesesáriu. Entaun ho estoke ne’ebé mamuk afeta tebes ba ita-nia atendimentu ba pasiente sira”, nia konklui.
Relasiona ho inspesaun ba ai-moruk, jornalista Tatoli konfirma Diretór INFPM maibé la iha fatin ka moras
Jornalista : Felicidade Ximenes
Editór : Zezito Silva
