DILI, 18 dezembru 2023 (TATOLI) – Ministériu Edukasaun (ME) kontinua prevee osan ho montante rihun $35 atu superviziona implementasaun programa merenda eskolár ne’ebé mak Ministériu Administrasaun Estatál (MAE) implementa ona ba eskola sira iha territóriu nasionál.
Ministra Edukasaun, Dulce de Jesus Soares, liuhusi debate Orsamentu Jerál Estadu 2024, iha Parlamentu Nasionál, segunda ne’e, katak maski orsamentu programa merenda eskolár nian prevee ona husi MAE ba tinan tomak maibé Ministériu Edukasaun iha nafatin responsabilidade atu tau osan hodi halo monitorizasun no supervizaun ba implementasaun programa merenda eskolár.
Nia dehan orsamentu ne’ebé ME prevee ne’e atu apoiu ekipa sira hodi kontinua halo servisu no akompaña implementasaun programa merenda eskolár ba eskola sira. Tanba, atividade supervizaun ne’e sei bele implementa de’it husi ME basá Ministériu ne’e mak iha inspetór Eskolár iha nível ensinu hotu.
Notísia relevante: ME tenke monitoriza nafatin implementasaun merenda eskolár
Nia hatutan, aleinde halo supervizaun, hala’o mós formasaun relasiona ba programa merenda eskolár ne’ebé sei implementa iha tinan 2024, nune’e bele hadi’a fallansu ruma ne’ebé akontese iha implementasaun refere.
“Ami sei halo esforsu atu tau importánsia ba kualidade merenda eskolár ne’e rasik. Ami sei ezije ba inspetór eskolár sira atu servisu ho responsabilidade hodi lori susesu ba programa ne’e rasik,” Dulce tenik.
Entretantu, Deputada Bankada Opozisaun FRETILIN, Cristina Verdial husu ba ME atu uza osan supervizaun merenda eskolár ho responsabilidade atubele hadi’a kualidade merenda eskolár ba tinan oin. Tanba, husi atividade supervizaun ne’e mak bele fó input ruma hodibele fó tulun ba Ministériu atu foti desizaun relasiona ho progresu merenda eskolár nian iha tinan oin.
Jornalista: Tomé Amado
Editór: Rafael Ximenes de A. Belo
