Top

Ministru justisa hato’o traballador timoroan nia preokupasaun kona-ba pasaporte ba PR

DILI, 18 dezembru 2023 (TATOLI)—Ministru Justisa (MJ), Amândio de Sá Benevides, segunda ne’e, hasoru malu ho Prezidente Repúblika, José Ramos Horta, hodi ko’alia kona-ba sidadaun timoroan sira-ne’ebé servisu iha Irlándia, Korea no seluk tan.

“Ohin, ko’alia kona-ba preokupasaun sidadaun sira iha ra’i-liur liuliu sira iha UK kona-ba passaporte traballadór nian. Ida-ne’e mak ha’u mai esplika ba Prezidente Repúblika, oinsá Governu nia planu ba asuntu ida-ne’e. Governu tau osan, nune’e tinan oin mai bele atende ita-nia komunidade iha UK, Korea no ita-nia sidadaun sira halo servisu ba,” Ministru Amándio hateten ba jornalista sira hafoin enkontru ho Xefe Estadu iha Palásiu Prezidensiál Nicolau Lobato, Bairru Pite.

Nia esplika, tinan oin planu ne’e sei realiza tanba Orsamentu Jerál Estadu 2024 ne’e daudaun ne’e Parlamentu Nasionál (PN) halo diskusaun iha faze espesialidade no aprova daudaun ona.

“Tinan oin sei atende ita-nia sidadaun sira iha diáspora tanba orsamentu aprova ona horisehik,” nia dehan.

Governu liuhosi Ministériu Justisa (MJ) sei instala servisu notariadu iha Portugal, Inglatera Irlandia no Korea iha tinan oin, hodi atende traballadór timoroan sira hela iha rai hirak ne’e.

“Governu hanoin hela, tinan oin sei instala servisu notariadu iha rai-li’ur liuhosi destakamentu funsionáriu notariadu iha Portugál, Inglatera, Irlandia no Korea atu sira ba halo atendimentu dokumentu ba ita-nia sidadaun sira iha rai-li’ur duké ita-nia ema iha li’ur tenke soe tempu hodi mai iha ne’e,” nia dehan.

Jornalista : Osória Marques

Editór        : Cancio Ximenes

Publisidade

Leave a Reply

Latest Post

error: Content is protected !!