Yayasan Malaka-NTT loke oportunidade ba Covalima-oan 500 asesu bolsa estudu
COVALIMA, 18 dezembru 2023 (TATOLI)–Yayasan Malaka ba Eskola Tékniku Vokasionál loke oportunidade ba Covalima-oan na’in-500 atu asesu bolsa estudu iha eskola Genoveva School Nusantara (GSN) Repúblik Indonesia (RI) iha minisípiu Malaka, provinsia Nusa Tenggara Timur (NTT).
“Ami mai iha Covalima atu konfirma ho Diretór Edukasaun ne’ebé durante ne’e halo komunikasaun iha fulan hirak liu-ba, hafoin Sekretáriu Estadu Tékniku Vokasionál hatuur fatuk dahuluk iha loron 06 novembru 2023, iha eskola Genoveva School atu asesu bolsa estudu vokasi Indonézia no Timor-Leste,” Xefe ezekutivu bolsa estudu vokasi Malaka, Adriana Febriana Luruk Seran, hateten ba jornalista sira iha edifísiu servisu edukasaun Covalima, segunda-ne’e.
Ekipa presiza atu mai followup Servisu Edukasaun Covalima nia serbisu, tanba estudante sira hetan oportunidade atu asesu bolsa estudu iha eskola vokasi Malaka durante tinan liman (5) nia laran.
Bazeia ba alvu fó oportunidade ba Covalima-oan másimu na’in-500 no mínimu na’in-100 ne’ebé rekomenda hodi asesu bolsa estudu refere.
“Ami mai iha Covalima atu fó informasaun ofisiál ba diretór edukasaun munisípiu Covalima ba estudante ne’ebé atu kontinua sira-nia estudu iha tékniku vokasionál,” nia hateten.
Bolsa estudu ne’e loke oportunidade ba agrikultór, funsionáriu no deputadu nia oan sira, tanba ne’e ekipa hosi Indonézia sei halo sensibilizasaun kona-ba programa asesu bolsa estudu iha Malaka-Indonézia.
Programa bolsa estudu ne’e, orsamenta hosi Estadu Timor-Leste ho Repúblika Indonézia (RI) ne’e iha 75% no mai hosi inan-aman 25%, maibé la obriga inan-aman sira haruka nia oan sira atu asesu bolsa estudu refere.
Diretór Edukasaun Covalima, Francelino Freitas Carvalho, hato’o agradesimentu ba Governu Timor-Leste ne’ebé servisu hamutuk ho Repúblika Indonezia hodi loke oportunidade ba estudante sira hodi asesu bolsa estudu iha Malaka-NTT.
“Ha’u hato’o agradese ba ita-nia Governu Timor-Leste ho Indonézia iha hanoin hodi ofrese bolsa estudu ba ita-nia oan sira,” nia dehan.
Ho nune’e, nia dehan, Edukasaun Covalima sei halo esforsu hamutuk ho manorin sira atu sensibiliza programa bolsa estudu ba inan-aman sira, nune’e estudante sira bele kontinua sira-nia estudu iha ensinu sekundariu tekniku vokasionál Malaka.
Atu asesu bolsa estudu ne’e, ekipa hosi Indonéza Malaka mak sei halo sensibilizasaun hamutuk ho ekipa munisípiu ba Eskola Bázika Centrál (EBC) lima (5) no Eskola Bázika Filiál lima (5).
Ho nune’e, Edukasaun Covalima seidauk identifika eskola maibé ida-ne’e sei loke oportunidade ba ema hotu atu asesu ba bolsa estudu.
Jornalista : Celestina Teles
Editór : Cancio Ximenes
