DILI,19 dezembru 2023 (TATOLI)-Asosiasaun Chega ba ita (ACbit) fó advokasia no apoia ba sobrevivente hosi konflitu pasadu hosi tinan 1975 to’o 1999 hamutuk 735 hosi munisípiu hotu.
“Ita koko haree sira nia problema sira no fó protesaun ba sira. Ami serbisu tinan naruk desde 2009, ita tau matan ba sobrevivente sira hosi konflitu pasadu hamutuk 735 kompostu feto 661 no mane iha 74”, Diretora Acbit, Manuela Leong Pereira, hatete ba Agência Tatoli, iha Santa Cruz-Dili.
ACbit tau matan ba sobrevivente sira ne’e hosi konflitu 1999 ba kotuk ne’ebé simu konsekuénsia husi funu libertasaun nasionál liuliu hetan persegisaun no la’en mate no hetan violasaun sexual liu’liu feto sira.
“Ita halo peskiza ba sobrevivente sira nia situasaun no kondisaun moris hodi asesu ba iha saúde no rekursu sira, tanba lakon la’en entaun hetan diskrimisaun ba oan sira no lakon rai, maibé iha kazu oin-oin mak sira hasoru oan sira la eskola”, nia refere.
Nune’e, nia afirma Acbit fó apoiu liuhusi aproximasaun ka apoiu fundu ekonomia hodi halo negósiu ba grupu sobrevivente hamutuk ualua, apoiu saúde hamutuk 100 hodi halo tratamentu, bolsu estudu ba oan hosi sobrevivente sira hamutuk ema besik na’in-10 hodi kontinua eskola no halo uma rua ba sobrevivente sira.
Acbit mós fó formasaun kona-bá jestaun finanseira no oinsá iha korajen atu ko’alia sai kona-bá situsaun ne’ebé sira enfrenta.
Alende ne’e, Acbit aprezenta proposta ba Ministériu Solidariedade Sosiál no Inkluzaun, Servisu de Apoio a Sociedade Civil no Auditoria Social, Centro Nasionál Chega, Asian Justice And Right no Fundsaun Alola, Global Survivors Fund husi América no ACbit hetan akordu ida hosi Misereor hosi Alemaña hodi fó apoia finanseiru kada tinan.
” Misereor Alemaña fó apoiu finanseiru ba servisu Asosiasaun Chega ba ita (ACbit) liu tinan sanulu resin ona,” katak
Nia dehan: “Sira fó fiar ba ami kona-bá serbisu Acbit, entaun ami asina akordu ida kada tinan tolu hodi hetan fundu hodi bele hala’o atividade ba peskiza no apoiu sobrevivente sira”.
ACbit servisu tinan naruk ho vítima sira ne’e tanba hosi Misereor Alemaña mak hakarak feto sira koa’lia sai sira nia problema hodi bele sente kma’an no sente forte, rekoñese sira nia istória no kontribuisaun iha funu.
Jornalista: Jesuína Xavier
Editór : Florencio Miranda Ximenes
