DILI, 19 dezembru 2023 (TATOLI)—Parlamentu Nasionál (PN), tersa ne’e, aprova proposta-lei Orsamentu Jerál Estadu (OJE) tinan fiskál 2024 ba Autoridade Rejiaun Administrativa Espesiál Oé-Cusse Ambeno (RAEOA) iha espesialidade ho votu a-favór 42, kontra neen (6) no abstensaun 17.
“Ne’ebé tabela XI-Despeza sub-setór Rejiaun Administrativa Espesiál Oé-Cusse Ambeno pasa,” Prezidente Parlamentu Nasionál, Maria Fernanda Lay, fó sai iha sala plenária PN iha debate proposta OJE 2024 iha faze espesialidade.
Proposta OJE 2024 ba RAEOA ho montante milaun $40 hodi aloka ba saláriu vensimentu $14.351.592, bens no serbisu $11.090.833, transferénsia públika $4.307.575, kapitál menór rihun $350, kapitál dezenvolvimentu $9.900.000.
Hosi orsamentu ne’e aloka ba programa dezenvolvimentu rurál no urbanu $194.567, programa seguransa nasionál $25.500, programa asesu justisa $1.116.100, programa funsionamentu no dezenvolvimentu instituisionál $21.277.705, programa ensinu báziku $1.069.320.
Programa saúde $681.063, programa dezenvolvimentu no reforsu zona ho tratamentu administrativu no ekonómiku espesiál $14.346.975¸programa edukasaun no formasaun $913.114, programa inkluzaun sosiál $96.878, programa turizmu $63.309.
Programa investimentu no diversifikasaun ekonómika $68.969, programa jestaun sustentável rekursu naturais, utilizasaun no konservasaun $17.500, programa aumentu sustentável produtividade no produsaun $129.000.
Fundu espesiál dezenvolvimentu RAEOA aprovadu
Entretantu, PN mós aprova fundu espesiál dezenvolvimentu Rejiaun Administrativa Espesiál Oé-Cusse Ambeno ho millaun $20 hodi aloka ba saláriu vensimentu $598.198, bens no serbisu $9.930.614, transferénsia públika $2.871.110, kapitál menór laiha no kapitál dezenvolvimentu $6.600.002.
Hosi orsamentu ne’e aloka ba programa estrada no ponte $6.600.002, programa bolsu estudu $108.503, programa tipu formasaun sira seluk $135.004, programa funsionamentu no dezenvolvimentu instituisionál $810.962.
Programa eletrisidade $5.912.440, programa aeroportu $3.933.082¸ programa dezenvolvimentu no refosu zona ho tratamenu administrativu no ekonómiku espesiál $2.500.007, nune’e proposta OJE 2024 ba RAEOA ho fundu espesiál ne’ebé iha totál konsolidadu hamutuk millaun $60.
Deputadu CNRT, Natalino dos Santos, rekomenda liuliu iha kapitál dezenvolvimentu atu ba Governu sentrál haree projetu sira la’o hela iha Oé-Cusse, inklui atu haree mós infraestrutura ne’ebé kria ona hanesan ponte balun konstrusaun kondisaun ladi’ak ona, nune’e husu koloka ona Ajénsia Dezenvolvimentu Nasionál (ADN) hodi haree kualidade projetu.
Jornalista : Nelson de Sousa
Editór : Cancio Ximenes
