PR husu Governu atu mellora HNGV sai di’ak liután
DILI, 19 dezembru 2023 (TATOLI) – Prezidente Repúblika, José Ramos Horta, husu Governu atu mellora di’ak liután ba Hospitál Nasionál Guido Valadares (HNGV), hodi fó tratamentu saúde ne’ebé adekuadu ba pasiente sira.
“Ha’u haree kondisaun HNGV agora di’ak liu kompara ho tinan 10 liubá, maibé Governu tenke investe nafatin osan mai HNGV hodi hadi’ak di’ak liután atu bele fó tratamentu ne’ebé adekuadu ba pasiente sira”, Xefe Estadu José Ramos Horta, dehan iha HNGV, ohin.
Nia husu ba Governu atu tau orsamentu boot liután ba HNGV atu bele sai hanesan iha Bali Indonézia no Singapura.
“Ita-nia Governu mak tenke tau osan boot ba ospitál atu nia nivel ne’e hanesan Bali, Singapura tanba ita nasaun independente soberanu tinan 20-resin ona atu tama ASEAN tenke iha ospitál ne’ebé mak modernu”, nia informa.
Iha fatin hanesan, Ministra Saúde Elia dos Reis Amaral, hatan katak HNGV ida-ne’e tau planu hodi hadia di’ak liután ba futuru.
“Ita hatene katak ita sei haree ba planu estudu viabilidade ho di’ak maibé oinsá HNGV atu sai di’ak mak presiza planu adekuadu ba futuru sai kualidade ne’ebé mak di’ak”, Elia dos Reis Amaral konklui.
Jornalista : Felicidade Ximenes
Editór : Zezito Silva
