PR vizita HNGV fahe prezente Natál ba pasiente sira
DILI, 19 dezembru 2023 (TATOLI) – Prezidente Repúblika, José Ramos Horta, hala’o vizita ba Hospitál Nasional Guido Valadares (HNGV), hodi fahe prezente Natal ba pasiente vunerável sira.
“Ohin ha’u mai vizita iha HNGV hodi fahe prezente Natál ba pasiente vunerável ne’ebé mak la iha kbiit, ita fó ba sira tanba la’os besik Natál mak ha’u mai, maibé ha’u ajuda uluk iha Governu da-ualu nian iha momentu ne’eba, tempu dengue ha’u apoiu bee ba pasiente sira liuhosi kompaña Gota”, José Ramos Horta dehan ba jornalista sira bainhira remata vizita iha HNGV ohin.
Nia dehan, iha vizita ne’e akompaña mós husi Ministra Saúde hodi haree kondisaun mákina faze ran nian tanba vizita ne’e la’os Natál mak mai maibé tempu bainloron sempre mai hodi haree pasiente sira.
“Ohin ha’u ho Ministra Saúde haree kondisaun faze raan nian husi-ne’e mákina ne’ebé mak iha hamutuk 14 mak funsiona ema lubuk ona mak faze raan iha HNGV”, nia esplika.
Tanba ne’e, Xefe Estadu husu ba Governu liuhosi Ministériu Saúde oinsá bele haree kondisaun sira ne’e bele hadiak di’ak liután ba futuru tanba setór saúde ida-ne’e imporante tebes iha setór hotu.
Iha fatin hanesan, Ministra Saúde Elia dos Reis Amaral, hateten Prezidente Repúblika vizita HNGV ida-ne’e hodi apoiu prezente Natal ba labarik vulnerável sira ne’ebé mak moras no halo tratamentu iha ne’e.
“Ohin PR apoiu prezente Natál ba labarik sira ne’ebé mak ita identifika ona hanesan pasiente ne’ebé mak vulnerável mai husi munisípiu sira ne’ebé ita presiza tulun mak iha labarik nain neen”, Elia dos Reis Amaral afirma.
Prezidente Repúblika nia vizita ne’e iha Departamentu Pediatria, Neofrolojia, Kuidadu Paliativu, Sirurjia elektiva, Sirurjia emerjénsia no Medisina interna emerjénsia.
Jornalista : Felicidade Ximenes
Editór : Zezito Silva
