Top

Alkatiri apela partidu polítika sira hamutuk identifika problema kauza nasionál

Eis Primeiru Ministru, Mari Alkatiri. Imajen Tatoli/Francisco Sony

DILI, 20 dezembru 2023 (TATOLI)—Deputadu titulár hosi bankada FRETILIN, Mari Bin Amude Alkatiri, apela ba partidu hotu iha asentu parlamentár atu hamutuk identifika problema kauza nasionál hanesan kombante kiak no diversifikasaun ekonomia.

“Ita tenke identifika didi’ak kauza nasionál. Kauza nasionál la’ós kauza partidu ida –ian. Kauza nasionál mak atu kombate ka hatun ki’ak. Se kauza nasionál kombate kiak inimigu la’ós partidu a ka b, inimigu mak ki’ak, ne’e mak ita tenke hatene. Se ita la hamutuk hateke ba oin tuir dalan sira hanesan ne’e, ita sei monu iha dalan klaran,” Mari Alkatiri hato’o apelu ne’e liuhosi deklarasaun votu hafoin aprovasaun finál globál ba proposta-lei Orsamentu Jerál Estadu (OJE) 2024 iha uma fukum PN, kuarta ne’e.

Ba kestaun ida-ne’e, nia hatutan, tenke hahú investe agora iha diversifikasaun ekonomika atu harii ekonomia reziliente no ekonomia sirkulár, ne’e mak tenke halo no tenke hakotu tiha.

Iha parte seluk, Marí Alkatiri hato’o pozisaun bankada nian hodi vota kontra proposta OJE 2024 iha finál globál.

“Ha’u mai, ohin, iha ne’e la’ós atu vota kontra de’it. Ha’u vota kontra tanba ha’u-nia laran moras, vota kontra tanba klima ne’ebé ita harii iha diskusaun programa Governu nian, ita laiha kapasidade atu kontinua. Ha’u vota kontra em nome FRETILIN hosi bankada no rihun 178 votu ami simu. Vota kontra tanba saida mak ami promote atu halo opozisaun konstrutiva no haree hosi parte seluk lahatene saida mak opozisaun konstrutiva,” nia hateten.

Tuir Nia, opozisaun konstrutiva sempre interasaun pozitiva, interasaun konstrutiva entre sé mak ukun bele ukun ba povu tomak no sé mak halo opozisaun atu serbi mós povu tomak.

Tanba ne’e, lori FRETILIN tomak vota kontra orsamentu ida-ne’e, tanba lee tiha ona orsamentu ne’e laiha indikadór hatudu ba atu la’o ba ne’ebé, indikadór dezempeñu falta iha orsamentu ne’e, tau medida oioin maibé la hatudu dalan atu ba oin oinsá.

“Se ita bele iha duni intendimentu interasaun orsamentu ne’e sei sai orsamentu di’ak-liu ba rai ida-ne’e, ita tempu ida susar liu ne’e laiha. Ha’u husu deskulpa maibé laiha,” nia dehan.

Mari Alkatiri hateten, ninia prezensa iha uma fukun PN iha esperansa ida mós atu hasoru Primeiru-Ministru (PM), Kay Rala Xanana Gusmão, maibé laiha fatin.

“Ha’u mai iha ne’e mós ho esperansa atu hasoru ha’u-nia alin Primeiru-Ministru, maibé la haree nia iha ne’e. Ha’u dehan ha’u-nia alin ne’e, ha’u sita ha’u-nia alin nia deklarasaun duni iha polítika ha’u mak maun no iha idade nia mak maun. Ha’u bolu alin signifika iha relasaun entre irmaun la’ós relasaun entre inimigu ne’e laiha, relasaun entre irmaun laiha ódiu no vingansa, tanba ne’e reforsa tan vontade atu vota kontra,” nia hateten.

Eis PM ne’e hateten, hosi ne’e ba oin medida balun nia-parte hakarak propoin títulu pesoál respeitu mutúo no kontinuidade Estadu no buka dalan entendimentu bainhira hakarak harii Estadu no hametin Estadu sai Estadu direitu demkorátika forte no sai Estadu ida ba jerasaun tuir mai.

“No, ida-ne’e hakotu tiha konflitualidade, konflitu inter-orgániku, Estadu ne’e iha órgaun soberania haat no bainhira konflitu inter-orgániku mosu Estadu rahun, hapara tiha ida-ne’e. Ohin loron, ita asiste konflitu inter-orgániku,” nia dehan.

Hanesan fundadór nasaun hato’o katak dalan laiha ba bainhira la serbisu hamutuk, dalan so tenke la’o ba oin bainhira simu katak hotu-hotu fó nia kontribuisaun no fó kontribuisaun.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!