Governu hato’o agradesimentu ba Deputadu sira-nia kontribuisaun iha debate OJE 2024

DILI, 20 dezembru 2023 (TATOLI)—Primeir- Ministru interinu no Atuál Vise Primeiru Ministru ba asuntu Sosiál, Mariano Assanami Sabino, lori IX Governu Konstituisionál hato’o agradesimentu ba Deputadu sira iha Parlamentu Nasionál (PN) durante hala’o debate ba Orsamentu Jerál Estadu (OJE) 2024.

Notísia Relevante: PN aprova proposta-lei OJE 2024 iha finál globál ho votu a-favór 41

“La haluha hato’o agradesimentu no apresiasaun boot no kontribuisaun ideia, hanoin di’ak no sujestaun ita-boot sira Deptuadu aprezenta durante inísiu debate to’o loron ikus ho laran tomak. Lori IX Governu konstituisionál husu perdaun bainhira liafuan ruma iha debate karik la monu ba povu nia laran ho haraik-aan husu deskulpa,” Mariano Assanami Sabino hato’o iha nia intervensaun ikus hafoin PN halo aprovasaun finál globál ba proposta-lei OJE 2024 iha uma fukun PN, kuarta ne’e.

Liuhosi diskusaun ne’e hafanu ema hotu katak, ema hotu iha objetivu ida de’it timoroan tenke moris ho pál, tane aas valór sidadaun hotu-hotu nian no garante katak dezenvolvimentu tenke la’o ba oin.

Debate proposta-lei OJE 2024 durante loron hirak nia laran ne’e, hatudu katak ema hotu iha vontade di’ak, iha preokupasaun atu lori Timor-Leste ba oin ba iha futuru ida di’ak-liu.

“OJE 2024 kobre setór importante sira hotu ne’ebé mak sai nu’udar preokupasaun ba ita hotu nian, Liuhosi OJE 2024 mak ita reafirma ita-nia ukun rasik aan hodi garante hadi’a povu nia  kondisaun moris, hodi nune’e iha tempu fiskalizasaun na’in Deputadu sira bele haree nia impaktu no rezultadu iha terrenu,” nia hateten.

Tanba, ema hotu hatene no sente katak ukun rasik aan ida-ne’e seidauk bele lori mehi hotu-hotu ne’ebé ema hotu hakarak, povu sei moris hasoru difikuldade oioin no ida-ne’e sai preokupasaun no responsabilidade ema hotu nian.

IX Governu Konstitusionál komprometidu atu fó kontinuidade dezemvolve setór xave sira-ne’ebé mak reflete ona iha OJE hodi responde daudaun no lori haksolok no naroman ba timoroan hotu.

“Partisipasaun no kontribuisaun hosi parte hotu-hotu liuhosi diskusaun no diálogu aberta no konstrutivu. Importante hodi haburas no hametin demokrásia no kontribui transformasaun ne’ebé di’ak ba sidadaun Timor-Leste. Opozisaun no Deptuadu bankada Governu ne’e hahoris hosi eleisaun jerál ne’ebé mak hili hosi povu, tanba ne’e kaduak rua ne’ebé labele separa. Ita hotu importante lori ba nasaun ne’e ba oin,” nia dehan.

Jornalista : Nelson de Sousa

Editór        : Cancio Ximenes