KM aprova rejime direitu titulár no membru órgaun soberania
DILI, 20 dezembru 2023 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu dekretu-lei, kona-ba Rejime direitu titulár no membru órgaun soberania inklui titulár kargu polítiku sira.
Diploma ida-ne’e ho objetivu atu komplementa rejime sira ne’ebé hatuur ona iha lei númeru 7/2007, loron 25 jullu no iha lei númeru 14/2009, loron 21 outubru, relasiona ho direitu titulár no membru órgaun soberania no titulár kargu polítiku sira.
“Objetivu mak atu konsolida no halo norma sira ne’ebé daudaun ne’e vigora hela, sai komprensivel liután. Diploma ne’e abranje área oin-oin, inklui direitu ba rezidénsia ofisiál, subsídiu ba hela fatin, komunikasaun movel, asisténsia médika, no seguransa pesoál,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : Rejime Direitu Titulár no membru sira husi órgaun soberania aprova ona
Antes ne’e, projetu dekretu-lei ida-ne’e aprova ona hosi VIII Governu Konstitusionál iha reuniaun Konsellu Ministru iha loron 15 marsu 2023, maibé tanba diploma ne’e seidauk hetan promulgasaun, maka presiza submete fali projetu dekretu-lei ida-ne’e ba deliberasaun foun.
Jornalista : Antónia Gusmão
Editora : Julia Chatarina
