Top

Membru Governu esforsu aan ezekuta OJE 2024 lori benefísiu ba povu

Prezidente repúblika, José Ramos Horta toma pose ba Primeiru-ministru, Kayrala Xanana Gusmão no membru governu Konstitusionál da-sia, iha Palásiu Prezidensiál, Bairru-Pité, sábadu (01/06/2023). Imajen Tatoli/Egás Cristóvão

DILI, 20 dezembru 2023 (TATOLI)—Vise Bankada Partidu Demokrátiku (PD) iha Parlamentu Nasionál (PN), Deputada Sancha Margarida Tilman, apela ba membru IX Governu konstituisionál atu esforsu aan serbisu makaas hodi ezekuta Orsamentu Jerál Estadu (OJE) 2024, lori rezultadu no benefísiu di’ak ba povu Timor-Leste.

“Bankada Partidu Demokrátiku halo nia apelu atu IX Governu liuhosi nia membru Governu sira hotu serbisu iha ekipa, tula dikur ba malu hodi hametin ukun atu hala’o dezenvolvimentu ba ita-nia rain. Fó ona fiar ba IX Governu, nune’e dever ita hotu nian mak hakas-aan atu tane povu nia fiar ne’e hodi lori hikas progressu dezenvolvimentu nu’udar ita hotu nia,” nia hato’o liuhosi deklarasaun votu hafoin PN halo aprovasaun finál globál ba proposta-lei OJE 2024, iha uma fukun PN, kuarta ne’e.

Deputada hosi bankada Governu ne’e, reafirma bankada fó nafatin nia apoiu inkondisionál ba ukun IX Governu nian hodi hametin estabilidade polítika no promove dezemvolvimentu ida ekilibradu, ekuitativu no sustentável.

Xefe bankada CNRT, Duarte Nunes, hateten bankada CNRT vota a-favór ba OJE 2024 tanba OJE ne’e raan povu nian.

“Ami fiar OJE ne’ebé aloka ona tuir nia programa Governu sei ezekuta iha tempu tinan ida nia laran,” nia hateten.

Bankada CNRT hakarak louva lideransa meza tanba esforsu ne’ebé halo hodi asegura susesu ba aprovasaun OJE, no prezensa hosi Governu rasik ba oin ho esperansa ho konfiansa ne’ebé povu fó hodi implementa no ezekuta orsamentu ne’ebé aprova benefisia duni ba povu.

Vise bankada KHUNTO, Deputadu António Verdiál de Sousa, haree ba OJE 2024 ne’ebe aprova sai nu’udar tempu ba reafirma esperansa foun povu no nasaun Timor-Leste, tanba orsamentu ne’e mak raan ba Estadu no esperansa ba povu.

Tamba ne’e, bankada opozisaun KHUNTO liuhosi iha uma demokrásia ida-ne’e fó nafatin esperansa ba povu Timor-Leste, katak ho lideransa Primeiru=Ministru, Kay Rala Xanana Gusmao, sei lori tan novidade pozitivu liuhosi dezenvolvimentu nasionál.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!