PPN husu Governu ezekuta OJE 2024 ho didi’ak
DILI, 20 dezembru 2023 (TATOLI)—Prezidente Parlamentu Nasionál, Maria Fernanda Lay, husu IX Governu konstituisionál atu ezekuta Orsamentu Jerál Estadu (OJE) 2024 ho didi’ak hodi fó benefísiu ba povu tomak.
Notísia Relevante: PN aprova proposta-lei OJE 2024 iha finál globál ho votu a-favór 41
“Husu ba Primeiru-Ministru interinu no IX Governu konstituisionál tomak, bankada opozisaun dezáfia ita-boot sira, hodi nune’e ezekuta Orsamentu Jerál Estadu (OJE) 2024 ho didi’ak,” Prezidente PN hato’o hafoin PN halo aprovasaun finál globál ba proposta OJE 2024, iha uma fukun PN, kuarta ne’e.
Nia mós apela ba bankada parlamentár liuliu ba komisaun espesializada permanente sira atu fiskaliza ho rigór, utiliza ferramenta fiskalizasaun ne’ebé prevee ona iha rejimentu PN.
Fernanda Lay, apela mós ba bankada parlamentár atu eduka Deputadu husi bankada atu respeita malu hodi dignifika própriu PN ho ita nia atetude.
PN liuhosi reuniaun plenária, aprova proposta lei númeru 4/VI(1a) Orsamentu Jerál Estadu (OJE) 2024 ho montante biliaun $1,95 iha finál globál ho votu a-favór 41, kontra 23 no abstensaun laiha.
Ho aprovasaun ne’e, Komisaun C trata asuntu Finansa Públika sei halo redasaun finál hafoin meza sei envia ba Prezidente Repúblika mak iha kompeténsia eskluziva atu promulga.
Proposta-Lei OJE 2024 ne’ebé Governu aprezenta ho montante konsolidadu biliaun $1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál.
Hosi montante ne’e, fahe ba kategoria saláriu no vensimentu, bens no servisu millaun $386,3, transferénsia públika millaun $589,7, kapitál menór millaun $34,2 no kapitál dezenvolvimentu millaun $411.
Orsamentu Seguransa Sosiál inklui Fundu Rezerva Seguransa Sosiál hetan alokasaun millaun $347,6 no prevee mós ba asuntu ekonómiku millaun $788,2, protesaun sosiál millaun $467,1, edukasaun millaun $140,9, saúde millaun $66,2 no abitasaun no infraestrutura koletiva millaun $45,2.
Jornalista : Nelson de Sousa
Editór : Cancio Ximenes
