DILI, 21 dezembru 2023 (TATOLI)- Ajénsia Promosaun Investimentu no Esportasaun (TradeInvest Timor-Leste) organiza enkontru tékniku hodi fasilita pedidu proposta investimentu husi Empreza Ceslink, S.A.
Ceslink S.A hanesan kompañia nasionál ida ne’ebé tuir planu atu investe iha setór telekomunikasaun iha Timor-Leste ho kapitál investimentu hamutuk millaun $5.
“Hanesan emprezáriu timoroan ida ne’ebé hetan osan iha rai ne’e, hakarak investe fila-fali iha rai ne’e hodi bele kontribui ba prosesu dezenvolvimentu iha Timor-Leste,” haktuir Diretór Empreza Ceslink S.A, Sergio Campos dos Santos, liuhosi nota ne’ebé Agência Tatoli asesu, kinta ne’e.
Objetivu husi aprezentasaun proposta investimentu ne’e, atu governu liuhosi diresaun kompetente no relevante sira hodi halo análiza tékniku ba empreza nia planu négosiu ne’ebé aplika ba Akordu Espesiál Investimentu (AEI) tuir Lei Investimentu Privadu númeru 15/2017.
Nune’e, aprezentasaun proposta investimentu ne’e lidera husi, Diretór Ezekutivu TradeInvest Timor-Leste Arcanjo da Silva ne’ebé akompaña mos husi Asesór Ministériu Koordenadór ba Asuntu Ekonómiku (MKAE), Feliciano da Costa no mós partisipa másimu husi reprezentante instituisaun relevante sira hanesan, Autoridade Nasionál Komunikasaun (ANC), Servisu Rejistu no Verifikasaun Emprezariál (SERVE), Autoridade Tributária, Ministériu Planeamentu Investimentu no Estratéjiku (MPIE), Eletricidade de Timor-Leste, Empreza Públiku (EDTL,E.P) TIC TIMOR, Diresaun Nasionál Edifikasaun, IGT, Servisu Migrasaun no Autoridade Nasionál Lisensa Ambientál, Institutu Públiku (ANLA, I.P).
Entretantu, empreza telekomunikasaun ne’ebé agora halo operasaun iha Timor-Leste mak Timor-Telecom, Telemor no Telkomcel.
Timor-Tekecom hahú nia operasaun iha tinan 2003. Telemor iha 2013 no Telkomcel, empreza telekomunikasaun Indonézia, lansa ofisialmente iha 2013.
Notísia relevante : https://tatoli.tl/2019/02/20/governu-aprova-investimentu-operador-telekomunikasaun-ceslink/
Jornalista : Antónia Gusmão
Editór: Rafael Ximenes de A. Belo
