DILI, 21 dezembru 2023 (TATOLI)– Ekipa konjunta kompostu hosi Diresaun Nasionál Transporte Terrestre (DNTT) no Polísia Nasionál Timor-Leste (PNTL), liuhosi Departamentu Tránzitu Seguransa Rodoviária Nasionál apela ba motorista hotu atu kumpri regra ne’ebé estabelese ona liuhosi Kódigu Estrada númeru 6/2003 katak labele tula pasajeiru labele liu kouta.
“Hakarak informa ba públiku hotu katak lakle’ur tan tama ona ba loron boot (Natal no tinan foun-2024). Ho ida-ne’e, DNTT hakarak informa ba maluk sira ne’ebé atu utiliza transporte públiku tenke kumpri regra ne’ebé Estadu hasai ona. Enkuantu ba motorista sira molok viajen tenke haree didi’ak dokumentu hanesan Livereti, folla espesaun no lisensa trajetu”, Diretór Nasionál Transporte Terrestre interinu, Nelson Siqueira Martins apela liuhosi konferénsia imprensa, iha salaun enkontru DNTT, Balide, kuarta ne’e.
Alende ne’e, fó hanoin mós ba motorista sira lori karta kondusaun bainhira halo viajen, hosi kapitál Dili ba munisípiu ho seguru no labele difikulta viajen bainhira autoridade seguransa halo pasa revista iha estrada públiku.
“Apela mós katak motorista sira tenke kumpri regra ne’ebé estabelese ona iha lisensa trazetu, hanesan bus; ita-boot sira só bele tula pasajeiru na’in-24, no mikrolete na’in 12, anguna kiik na’in 12 no boot na’in 24. Tanba ne’e, husu ba motorista sira tenke fó atendimentu di’ak ba pasajeiru no halo tuir regra, kuandu viola maka Polísia Tránzitu foti medida tuir regra ne’ebé estabelese tiha ona iha kódigu Estada númeru 6/2002”, nia tenik.
DNTT mós husu ba motorista sira atu labele hasa’e tarifa tuir hakarak tanba Governu liuhosi Ministériu Transporte no Komunikasaun hasai ona sirkulár ida hodi define tiha ona tarifa no seidauk iha mudansa ba sirkulár refere.
Tanba ne’e, DNTT apela ba pasajeiru no públiku katak, bainhira motorista sira hasa’e tarifa tuir hakarak tenke keixa ba DNTT ka fó hatene ba polísia tránzitu ne’ebé besik, atu nune’e bele foti medida. Tanba dadaun DNTT destaka ona ninia funsionáriu iha terminál, ne’ebé ba oin sei serbisu hamutuk ho Polísia hodi kontrola di’ak liután ba transporte públiku.
DNTT serbisu hamutuk ho Ministériu Saúde no Polísia halo sosializasaun kada munisípiu inklui postu administrativu, sosializasaun kona-ba oinsá utiliza transporte públiku ne’ebé mak seguru.
Biban hanesan, Komandante Tránzitu Rodoviaria Nasionál, Asistente Superentidente Luís Soares, reforsa katak, Polísia Tránzitu la autoriza transporte públiku liu-liu Bus, mikrolete, Anguna no Grand Max tula pasajeiru liu koutasaun.
“Sei orienta seksaun Tránzitu iha munisípiu hotu hodi halo kontrolu ba movimentasaun tránzitu iha territóriu tomak”, nia afirma.
Nia dehan, bainhira kontra maka sei aplika kódigu estrada ne’ebé atribui kompeténsia ba Polísia Tránzitu. Nune’e, tuir kódigu estrada, iha artigu 54 hateten katak, tula pasajeiru liu koutasaun sei selu koima $11 to’o $15.
“Labele hanoin katak tanba selu osan kiik ne’ebé tenta atu viola, labele hanoin ida ne’e tanba sei iha tan artigu balun reforsa, tanba kontra ordem autoridade”, nia fó hanoin.
Notísia relevante:Aprovasaun Lei Kódigu Estrada atu mellora prevensaun no seguransa rodoviária
Jornalista : Antónia Gusmão
Editór : Rafael Ximenes de A. Belo
