Top

PN envia proposta-lei OJE 2024 ba PR

Deputada CNRT, Cedelízia Faria dos Santos. Imajen Tatoli/Egas Cristóvão.

DILI, 21 dezembru 2023 (TATOLI)—Prezidente Komisaun C trata asuntu Finansa Públika iha Parlamentu Nasionál (PN), Deputada Cedelizia dos Santos, hateten komisaun finaliza ona redasaun finál ba proposta-lei Orsamentu Jerál Estadu (OJE) 2024 hodi haruka ona ba meza Prezidente Parlamentu Nasionál no ohin envia ba Prezidente Repúblika (PR) hodi bele halo promulgasaun.

Notísia Relevante:  PN aprova proposta-lei OJE 2024 iha finál globál ho votu a-favór 41

“Ami horisehik komisaun C hamutuk ho Vise Ministra Finansa akompaña tékniku hosi Ministériu Finansa finaliza ona redasaun finál ba textu proposta-lei ne’e tomak no horisehik lorokraik kedas envia ba meza Prezidente Parlamentu Nasionál. No, ami fiar se bele ohin, envia ona ba ita-nia Prezidente Repúblika hodi halo promulgasaun,” nia hateten ba jornalista sira iha uma fukun PN, kinta ne’e.

Redasaun finál totál tetu OJE 2024 nafatin mantein biliaun $1.95 maibé muda de’it mak iha ninia rúbrika sira, tanba iha mudansa iha proposta tolu mak iha impaktu ba mudansa.

Proposta tolu ne’ebé hetan mudansa mak hanesan iha PN rasik hosi sálariu vensimentu ba bens serbisu, no iha mós Ministériu Petróleu no Rekursu Minerál (MPRM) nian mudansa hosi bens serbisu ba kapitál menór no mós iha Institutu Jeosiénsia mudansa hosi bens serbisu ba saláriu vensimentu.

Tuir nia, iha rúbrika tolu mak iha mudansa maibé laiha impaktu ba tetu totál inisiál.

Prezidente Komisaun C ne’e hateten, proposta-lei OJE 2024 envia ba PR prazu la liuhosi loron lima, sura iha loron serbisu bele hetan ona promulgasaun.

Tanba ne’e, hanoin buat hotu loos hela Prezidente Repúblika bele foti loron rua ka tolu ho ninia ema legál sira haree bele promulga, nune’e fiar katak PR sei promulga iha tinan 2023 ne’e nia laran tanba iha 01 janeiru 2024 orsamentu tama entrada em vigor.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!