SERVE,I.P husu Governu kria lei dijitalizasaun sistema rejistu hodi fasilita investór
DILI, 21 dezembru 2023 (TATOLI)—Servisu Rejistu no Verifikasaun Emprezariál, Institutu Públiku (SERVE,I.P), husu Governu dasia, atu kria lei dijitalizasaun sistema rejistu ka rejistu eletróniku hodi fasilita setór privadu sira hakarak investe iha Timor-Leste.
“Ha’u husu Governu da-sia ida ne’e apoiu ami bele kria lei dijitalizasaun sistema rejistu online hodi fasilita ita-nia setór privadu sira iha rai-laran no rai-li’ur ne’ebé hakarak halo investimentu iha Timor-Leste. Tanba kada tinan setór privadu sira sempre kontribui reseita doméstiku ne’e valór boot, maibé ita seidauk iha lei dijitalizasaun ne’ebé autoriza SERVE,I.P halo rejistu eletróniku,” Diretór Ezekutivu SERVE,I.P, Florêncio Sanches, ba Agência Tatoli, iha nia knaaf-fatin, Hudi-Laran, Dili, kinta ne’e.
Governu presiza kria lei dijitalizasaun tanba sitema dijitalizaun ne’e rasik SERVE,I.P halo ona esforsu iha tinan haat ba kotuk SERVE,I.P desde tinan 2014 maibé seidauk bele aplika no sosa tanba sosa presiza ho osan boot, no seidauk bele aplika tanba laiha lei dijitalizasaun, ne’ebé permit SERVE,I.P halo rejistu eletróniku ida ne’e dezafiu boot.
Timor-Leste presiza sistema dijitalizaun tanba setór privadu sira hosi railiur hakarak halo investimentu iha Timór sira tenke lori sira-nia dokumentu to’o mai mak halo rejistu ida ne’e difikulta tebes dada investór sira mai.
“Agora ita atu adere ba Asosiasaun Nasaun Sudeste Aziátiku (ASEAN) no Organizasaun Mundiál Komérsiu (OMK) sira ejije buat hotu tenke dijitaliza, tanba ema nia nasaun hotuhotu iha sistema dijitalizasaun,” nia hateten.
Nia afirma, sistema ne’e rasik sosa ho osan boot milliaun $1 maibé kona-ba osan hanoin SERVE,I.P bele husu ba Krop Konsellu Ministru tau osan, SERVE,I.P bele husu doadór liuhosi Ministériu Finansa fó apoiu no Banku Mundiál inklui Banku Dezenvolvimentu Aziátiku (ADB) rasik mós hakarak finansia maibé tenke iha lei dijitalizasaun.
“Nune’e, Ha’u husu Governu ida ne’e tau prioridade ba iha lei dijitalizasaun no sibernetika atu fó dalan ba SERVE,I.P halo rejistu eletrónika,” nia dehan.
Jornalista : Arminda Fonseca
Editór : Florencio Miranda Ximenes
