Dezde janeiru HNGV deteta pozitivu kankru serviks 13
DILI, 22 dezembru 2023 (TATOLI) – Diretór Klínika Hospitál Nasionál Guido Valadares (HNGV), Marcelino Correia, dehan hosi janeiru to’o dezembru tinan ida-ne’e, HNGV deteta kazu pozitivu ba kankru serviks hamutuk 13.
“Tuir dadus ne’ebé mak HNGV halo screening ba pasiente sira ho kankru serviks hahú husi janeiru to’o iha fulan dezembru hamutuk 357, pasiente husi ne’e na’in 13 mak hetan pozitivu kankru serviks”, Marcelino Correia, informa iha nia kna’ar fatin HNGV, ohin.
Nia hateten, pasiente sira ne’ebé mak pozitivu kankru serviks mak durante médiku sira haruka ba Indonézia hodi halo tratamentu saúde iha ne’eba.
“Husi númeru ne’e sira ne’ebé mak hetan kankru serviks hamutuk 13 mak halo tratamentu, balun haruka ona ba rai liur, hodi ba kontinua kemoterapia no radioterapia iha rai liur”, nia esplika.
Nia afirma, sira ne’ebé mak atu halo screening kankru serviks husi idade 20 ba leten, ne’ebé sira na’in 13 ne’e, sira ne’ebé mak forma ona uma kain, husi sira ne’e balun fila ona mai Timor, depois ba fali kontinua, no balun nafatin halo tratamentu iha ne’eba.
“Sira ne’ebé kontinua halo tratamentu ne’e mak sira mai tiha fila-fali ba halo kemoterapia nafatin, tanba ita-nia fasilidade iha ne’e seidauk iha”, nia konklui.
Jornalista : Felicidade Ximenes
Editór : Zezito Silva
