Estoke ran iha Banku Sangue la sufisiente no husu apoiu
DILI, 22 dezembru 2023 (TATOLI) – Xefe Banku Sangue iha Hospitál Nasionál Guido Valadares (HNGV), Cladio Julio Quintão, dehan estoke ran daudaun ne’e la sufisiente atu apoiu ba pasiente sira tanba ne’e husu ema hotu atu apoiu ran.
“Ita-nia estoke ran daudaun ne’e menus liu atu apoiu ba pasiente sira ne’ebé mak presiza ran tanba ne’e ha’u husu ema hotu atu apoiu ran turuk ida hodi salva ema ne’ebé mak presiza ran”, Cladio Julio Quintão, informa iha nia kna’ar fatin Banku Sangue Bidau Tokobaru, ohin.
Nia dehan, iha fulan novembru, iha instituisaun balun apoiu maibé to’o agora la sufisiente inklui estudante husi Intituto Nasionál Saúde mós apoiu maibé iha ema na’in 10 de’it tanba sira iha hela atividade ezame nune’e estudante sira la disponivel atu apoiu ran.
“Estoke ran agora daudaun la garante ba loron boot tanba estoke limitadu los, entaun iha ne’e ita sei iha tipu ran A sei naton hamutuk 19, tipu ran B iha neen de’it signifika la sufisiente, entaun presiza família sira mak tenke ajuda mai suporta iha ne’e inklui tipu ran O mós hamutuk sia entaun estoke la sufisiente atu apoiu ba pasiente sira”, nia relata.
Nia esplika, ho estoke ran ne’ebé mak menus, Banku Sangue halao esforsu hela hodi halo aprosimasaun ba Embaixada, Universidade, Palásiu Prezidensiál no F-FDTL.
“Ami halo ona karta ba embaixada sira, instituisaun universidade no mós halo konfirmasaun ho Falintil Forsa Defeza Timor Leste (F-FDTL) atu sira suporta hela ran nune’e ami apoiu ba pasiente sira ne’ebé mak moras presiza ran”, nia haktuir.
Nia husu ba ema hotu atu bele kontribui ran turuk ida ba pasiente sira ne’eb’e mak presiza ran.
Jornalista : Felicidade Ximenes
Editór : Zezito Silva
