DILI, 22 dezembru 2023 (TATOLI)—Ministériu Komérsiu no Indústria (MKI), kinta semana ne’e, distribui ona foos tonelada 1.6 bá postu administrativu Lore munisípiu Lautém hodi responde ba programa bazaar baratu iha ámbitu selebrasaun natal 2023 no tinan foun 2024.
Ministru Komérsiu Indústria, Filipus Nino Pereira, hateten Bazaar Baratu ne’ebé Governu realiza iha Lore ne’e ho objetivu atu oinsá fasilita komunidade bele sosa produtu sira ho folin baratu durante selebrasaun natal no tinan foun.
“Item ne’ebé faan iha Bazaar Baratu ne’e hanesan mina han, masin midar, manu-tolun, deterjente hamutuk ho foos saku ida folin $11, maibé foos ne’ebé ita distribui hodi responde bazaar ne’e rasik hamutuk tonelada 1.6 bá saku karik hamutuk 1.700,” Filipus Nino Pereira hateten iha Bebora Dili.
Nia dehan, programa bazaar baratu ne’e, governu implementa iha área rurál liu hodi fasilita komunidade sira ne’ebé susar atu asesu merkadu nune’e sira bele sosa sasán hodi uja durante selebrasaun natal no tinan foun.
“Nune’e ami sei kontinua programa ne’e ba to’o suku sira alvu liu ba aldeia ne’ebé izoladu tebes, nune’e bele fasilita ba ita-nia komunidade,”nia reforsa.
Daudaun ne’e, Governu implementa bazaar baratu iha postu administrativu Lore, munisípiu Lautém, Atulurik munisípiu Covalima, no postu administrativu Lolotoe munisípiu Bobonaro.
Aleinde ne’e, MKI mós planea iha semana oin sei lori foos saku 100 bá munisípiu Ataúro hodi distribui ba komunidae área ne’ebá.
Atu responde programa bazaar baratu durante selebrasaun natal 2023 no tinan foun 2024 maka Governu liuhosi Ministériu Komérsiu no Indústria (MKI) prepara ona stoke foof tonelada 37.000.
Entertantu, Bazaar Baratu ne’e hahú implementa iha loron 15 fulan-dezembru no sei ramata iha 31 dezembru 2023.
Jornalista : Arminda Fonseca
Editór : Agapito dos Santos
