DILI, 22 dezembru 2023 (TATOLI)–Ministériu Komérsiu no Indústria (MKI), kinta ne’e, simu ona apoiu foos saka 500 no sasán nesesidade bázika hosi Assosiasaun Emprezariál Joven Xineza iha Timor-Leste hodi fó apoiu ba grupu vulneravél sira liuhosi programa Bazaar Baratu iha ámbitu selebrasaun natal no tinan foun 2024 nian.
Sekretáriu Jerál Asosiasaun Xineza Emprezariál iha Timor-Leste, Rudy Y Kawn hateten, ai-ha ne’ebé sira oferese ba MKI ne’e hanesan karidade ida hodi distribui ba maluk vulnerál sira iha ámbitu natal no tinan foun 2024 nian.
“Apoiu ne’ebé ami halo tanba Prezidente Repúblika no MKI realiza Bazaar Baratu atu tulun komunidade nune’e ami komunidade Xineza halo asaun karidade ida ne’e liuhosi Governu bele tulun maluk vulnerável sira iha área rurál,” Rudy Y Kawn, hateten iha Bebora Dili.
Nia esplika atividade asaun karidade ne’ebé sira halo la’os foin maka realiza maibé hahú hosi akontesimentu dezastre naturál iha abril 2021 no situasaun COVID-19.
Iha fatin hanesan, Ministériu Komérsiu no Indústria, Filipus Nino Pereira hateten, apoiu ne’ebé maluk AEJX-TL oferese ne’e maka hanesan foos (20kg) saku 500, manu-tolun rak 100, susu-ben kaixa haat, mina bimoli mili litru 250 hamutuk 65 no seluk tan.
“Apoiu sira ne’e distribui iha Kapitál Dili, maibé ita-nia ekipa sei halo verifikasaun hodi identifika ema ne’ebé merese duni atu simu mak ita fahe,”Nia hateten.
Jornalista : Arminda Fonseca
Editór : Agapito dos Santos
