DILI, 22 dezembru 2023 (TATOLI)– Prezidente Repúblika, José Ramos-Horta, sexta ne’e, promulga ona Orsamentu Jerál Estadu (OJE) tinan 2024, hafoin simu proposta ne’e iha loron 21 fulan-dezembru 2023 tuir dekretu Parlamentu Nasionál númeru 5/VI-OJE ba 2024.
“Hafoin promulgasaun, Prezidente Repúblika entrega kedas ba Prezidente Parlamentu Nasionál, Maria Fernanda Lay,” haktuir nota komunikadu imprensa ne’ebé Agência Tatoli asesu, sexta ne’e.
Notísia Relevante :PN aprova proposta-lei OJE 2024 iha finál globál ho votu a-favór 41
Hosi proposta OJE 2024 aprezeta husi Governu da-IX ne’ebé lidera hosi Primeiru-Ministru Kay Rala Xanana Gusmão, ba Parlamentu Nasionál iha loron 12 fulan-dezembru 2023 no hetan aprovosaun iha final globál iha loron 20 fulan-dezembru ho totál orsamentu billiaun $ 1.95.
Proposta OJE ne’ebe aprovadu ho totál konsolidadu millaun rihun $ 1,95 ba administrasaun sentrál, RAEOA no Seguransa Sosiál, sein Fundu Rezerva Seguransa Sosiál. Valór ida-ne’e inklui dotasaun millaun rihun $ 1,83 ba administrasaun sentrál no millaun $60 uza ba RAEOA.
No totál despeza ne’ebé prevee ba administrasaun sentrál no RAEOA hamutuk millaun $468,8 uza ba saláriu no vensimentu millaun $ 86,3, bens no servisu hamutuk millaun $ 589,7, transferénsias públikas millaun $34,2, kapitál menór millaun $411 ba kapitál dezenvolvimentu.
Enkuantu, orsamentu seguransa sosiál, inklui fundu rezerva seguransa sosiál iha montante millaun $ 347,6. Ba asuntu ekonomia, Governu prevee iha OJE tinan 2024 ho valór millaun $ 788,2, ba asuntu protesaun sosiál millaun $467,1, ba ba edukasaun millaun $ 140,9, ba saúde millaun $ 66,2, no millaun $ 45,2 ba abitasaun no infraestrutura koletiva.
Jornalista : Antónia Gusmão
Editór : Agapito dos Santos
