SEGURANSA, VIQUEQUE

F-FDTL no COE-BOP apoia PNTL Viqueque asegura tinan foun

F-FDTL no COE-BOP apoia PNTL Viqueque asegura tinan foun

Komandante PNTL munisípiu Viqueque, Superentendente João da Costa. Imajen Tatoli/Vitorino Lopes da Costa

VIQUEQUE, 27 dezembru 2023 (TATOLI)-Komandante Polísia Nasionál Timor-Leste (PNTL) munisípiu Viqueque, Superintendente João da Costa, informa, Falintil Forsa Defeza Timor-Leste (F-FDTL), Unidade Operasaun Espesiál (COE) no Unidade Batallaun Orden Públiku (BOP) kontinua apoia Polísia Nasionál Timor-Leste munisípiu Viqueque hodi fó seguransa ba simu tinan foun.

“Daudaun ne’e   PNTL Viqueque no hetan apoia forsa husi F-FDTL, COE no BOP sira kontinua destaka mai Viqueque hodi fó seguransa ba ita-nia abitante sira munisípiu Viqueque liuliu simu tinan foun,” Superintendente João da Costa, hateten ba jornalista sira, iha resintu munisípiu Viqueque, kuarta ne’e.

Superintendente João da Costa dehan, maske forsa kontinua apoia PNTL Viqueque, maibé prefere abitante sira husi munisípiu Viqueque tenke koopera ho seguransa hodi aseguransa ba loron boot simu tinan foun.

“Ita liu ona Natál, maibé se ita sei simu tán tinan foun. Ha’u hanoin simu tinan foun ida-ne’e ema hotu-hotu tenke kria pás, establidade, atu ema hotu-hotu bele moris iha ambiente hakmatek nian laran,” nia sujere.

Nune’e mós nia husu abitante munisípiu Viqueque hamutuk hodi kria pás no establidade, atu ema hotu-hotu festeja tinan foun ho di’ak nune’e mós hadook an husi krime sira.

“Ha’u husu juventede sira iha munisípiu Viqueque tomak labele lori problema partikular lori tama ba fatin públiku  hodi fó impaktu ba ema seluk ne’ebé la hatene problema; ida-ne’e maka ha’u hakarak husu ba joven sira no ita hamutuk hodi prevene krime sira-ne’ebé atu mosu mai. Ema maioria la gosta aktu krime, ema oituan maka gosta krime, buka problema, tan ne’e ami husu ita hotu hamutuk hodi komabate,” nia hato’o.

Autoridade polisiál ne’e relata, PNTL Viqueque identifika ona fatin sira-ne’ebé risku ba problema no sei tau seguransa no sei koloka membru PNTL ba kapela sira iha postu Uatulari no postu haat sira seluk atu nune’e sarani sira partisipa misa ba simu tinan foun nian ho hakmatek.

Enkuantu, forsa ne’ebé apoia PNTL munisípiu Viqueque no kompostu husi F-FDTL pelotaun ida, BOP na’in-10 no COE na’in-10 no atuál membru PNTL efetivu hamutuk na’in-136 iha   eskuadra PNTL lima hodi asegura ba loron boot simu tinan foun nian.

Jornalista : Vitorino Lopes da Costa

Editór      : Rafael Ximenes de A. Belo

iklan
iklan

Leave a Reply

iklan
error: Content is protected !!