DILI, 27 dezembru 2023 (TATOLI) – Xefe Departamentu Emerjénsia iha Hospitál Nasionál Guido Valadares (HNGV), Eldegar Lopes, hateten sala emerjénsia iha HNGV simu pasiente hamutuk 1.051 iha ámbitu selebrasaun loron boot Natál.
“Husi loron boot natal, hahú husi loron 22 to’o 26 dezembru, totál pasiente ne’ebé mak mai vizita no halo tratamentu saúde hamutuk 1.051, husi númeru ne’e, asidente asidente motor hamutuk 36 no asidente kareta na’in rua”, Eldegar Lopes informa iha nia kna’ar fatin, ohin.
Nia esplika, aleinde asidente iha mós kazu kiik sira hanesan violénsia doméstika hanesan baku malu iha na’in tolu, tuda malu iha na’in neen no sira ne’ebé la’o mak tuda kona, hamutuk na’in neen no hetan sona na’in ida. Nune’e mós iha na’in rua mak mate iha uma mak mai sala emerjensia HNGV.
“Kazu sira ne’ebé mak ladún grave ne’e ita haree iha 20% mak konsege baixa no haree kurativu to’o fila ba uma, entaun husi númeru sira ne’ebé mak mensiona ne’e balun ho moras sira seluk”, nia afirma.
Xefe Emerjénsia husu ba pasiente sira atu karik iha moras kamaan bele ba fasilidade saúde sira ne’ebé mak besik atu halo tratamentu iha ne’eba, karik komplikadu mak halo transferénsia mai HNGV atu médiku espesialista sira fó atendimentu másimu.
Jornalista : Felicidade Ximenes
Editór : Zezito Silva
