iklan

SEGURANSA, VIQUEQUE

Konfrontu Uatulari, PNTL detein ona suspeitu no aprezenta ona ba MP

Konfrontu Uatulari, PNTL detein ona suspeitu no aprezenta ona ba MP

Komandante PNTL Viqueque, Superintendente João da Costa. Imajen Tatoli/Vitorino Lopes da Costa

VIQUEQUE, 27 dezembru 2023 (TATOLI) – Komandante Polísia Nasionál Timor-Leste (PNTL) munisípiu Viqueque, Superintendente João da Costa, informa, akontesementu konfrontu iha loron 24 fulan dezembru kalan, PNTL munisípiu Viqueque detein ona suspeitu sira no aprezenta ona ba Ministériu Públiku (MP) hodi prosesa kazu ba tribunál.

“Kona-ba akontesementu konfrontu iha postu Uatulari ne’ebé akontese iha fatin rua ida akontese tempu misa 24 natál kalan, iha kapela suku Macadique, ida fali akontese iha igreja antiga Uatulari Atas entre abitante suku Afaloikai no suku Babulu, autór ba konfrontu husi fatin rua ne’e ami kaptura ona suspeitu sira. Ohin ami aprezenta ona ba Ministériu Públiku hodi kontinua kazu ba tribunal,” Superintendente João da Costa, hateten ba jornalista sira, iha resintu edifísiu munisípiu Viqueque, kuarta ne’e.

Superintendente João da Costa konta, kronolojia husi akontesementu konfrontu entre fatin rua iha kapela Macadique no Igreja antiga Uatulari Atas ne’e ninia motivu joven sira tiru fugeti la’ós tiru sa’e, maibé tiru ba fali ema hodi hamosu problema.

“Akontesementu ne’e kauza husi fogeti tanba joven sira tiru fugeti la’ós tiru sa’e, maibé sira tiru ba fali ema maka mosu problema tuda malu hodi rezulta ema balun tenke hetan kanek no sasán kapela nian balun hetan estragu. Ida-ne’ebé kanek ami lori sira ba fasilidade saúde hodi halo tratamentu no akontesmentu fatin rua ne’e suspeitu sira ami kaer hotu iha Macadique suspeitu na’in hitu no iha kapela Uatulari Atas na’in hitu”, nia akresenta.

João da Costa, relata, suspeitu husi Afaloikai no Babulu nian na’in-hitu PNTL aplika Termu Identidade Rezidénsia (TIR) ba suspeitu sira tanba sira kumpri ona detensaun 72 oras hodi kontinua prosesa MP no suspeitu sira husi suku Macadique mós hetan hotu TIR.

“Maske akontesementu ne’e fatin difirente, maibé ami konsege kaptura hotu autór sira no autoridade lokál sira mós koopera ho ami di’ak,” nia haktuir.

Alende ne’e, tuir líder másimu PNTL munisípiu Viqueque ne’e katak situasaun tempu natál iha munisípiu Viqueque, postu adiministrativu Uatulari maka rejista kazu no postu Uatucarbau, Lacluta, Viqueque Vila no Ossu la rejista kazu.

Jornalista : Vitorino Lopes da Costa

Editór      : Rafael Ximenes de A. Belo

iklan
iklan

Leave a Reply

iklan
error: Content is protected !!