BAUCAU, 27 dezembru 2023 (TATOLI) – Lideransa komunitária na’in-59 hosi munisípiu Baucau tuir formasaun kona-ba serbisu suku durante loron-tolu hosi Ministériu Admistrasaun Estatal (MAE).
Diretor Jerál Desentralizasaun no Governu Lokál hosi Ministériu Administrasaun Estatál, António Guterres, esplika, liuhosi diresaun apoia suku serbisu hamutuk ho Fundu Dezenvolvimentu Kapitál Umanu (FDCH, sigla portugés) realiza formasaun ba xefe suku sira iha territóriu nasionál inklui munisípiu Baucau mak faze ikus hosi tinan-2023 nian.
“Ami iha devér no obrigasaun atu fasilita formasaun báziku nune’e hakmatek hodi serbí nia povu,” nia koa’lia iha Vila Nova, kuarta ne’e.
Formasaun ho duransaun loron-tolu ne’ebé tuir planu sei finaliza iha loron-sesta, 29 dezembru ho matéria importante tolu hanesan hanesan prienxe livru 18 kona-ba atualiza dadus komunidade, jestaun finansa no kompeténsia xefi suku bazea ba lei-númeru 19/2016 kona-bá lideransa komunitária.
Munisípiu Baucau hamutuk xefe suku na’in-59 komposta hosi foun na’in-26, enkuantu re-eleitu na’in-33 ne’ebé importante atu hola parte iha formsaun refere tanba evolusaun no paradigma serbisu ne’ebé iha mundansa.
“Mesmu xefe suku tuan iha koñesementu maibé xefe suku foun seidauk iha koñesementu báziku kona-bá lala’ok serbisu hanesan prienxe livru 18, entaun ita fasilita,” António Guterres akresenta.
IX governu planeia sei halo rekrutamentu ba ofisiál suku na’in-haat iha tinan-2024, komposta hosi ofisiál apoia finansa, ofisiál administrasaun, sekretáriu suku no ofisiál asuntu suku nune’e bele apoia serbisu konsellu suku iha kada suku.
Xefi suku foun Abafala, postu admistrativu Quelicai, Agapito dos Reis, konsidera formasaun refere importante ba autoridade lokál sira tanba hasa’e koñesementu kona-bá serbisu suku nian bazea ba kompeténsia lideransa komunitária ne’ebé previstu iha lei-númeru 19/2016.
“Formsaun ne’e importante ba xefi suku nune’e hala’o funsaun ho responsabilidade,” Agapito dos Reis argumenta.
Tuir planu MAE sei kontinua fali formasaun hanesan iha inísiu 2024 iha Autoridade Administrativa Atauro no Liquiçá ne’ebé antes ne’e realiza ona iha munisípiu 12 iha territóriu nasionál.
Jornalista : Natalino Belo
Editór : Evaristo Soares Martins
