DILI, 27 dezembru 2023 (TATOLI)-Segundu Komandante Polísia Nasionál Timor-Leste (PNTL), Komisáriu Pedro Belo, hateten, PNTL sei servisu hamutuk ho Komandu F-FDTL atu halo operasaun ba fogete sira ne’ebé joven sira sunu iha tempu loron no kalan inklui joven sira ne’ebé tiru paixon iha komunidade nia leet.
Nia dehan, PNTL no F-FDTL presiza halo operasaun ba joven sira ne’ebé mak gosta tiru fogetes iha loron no kalan inklui tiru paixon iha loron ho kalan tanba iha keixa barak ne’ebé mai hosi Komunidade katak joven sira tiru fogetes no paixon iha bairru-bairru halo komunidade sira deskansa ladi’ak no halo ema hakfodak.
Belo hateten, joven sira-nia aktu ne’e viola ona regra despaixu ne’ebé Komandu Jerál fó sai katak fogetes ne’e só tiru iha ámbitu natál no tinan foun.
“Hahú ohin ba oin PNTL no F-FDTL sei halo operasaun konjunta hodi tama sai bairru-bairru iha Díli hodi halo kontrola ba joven sira ne’ebé tiru fogetes no paixon tuun sae,” Komisáriu Pedro Belo, liuhosi konferénsia imprensa ne’ebé halao iha Edifísiu Autoridade Munisipál Díli, kuarta ne’e.
Tanba iha despaixu hosi Komandu Jerál tiru fogetes ne’e tiru de’it iha dia 24 oras 01:00 inklui tinan foun 12:00.
“Maibé realidade ita-nia joven sira tiru Fugetes la tuir dexpaixu ne’ebé iha ho nune’e PNTL servisu hamutuk ho F-FDTL sei halo operasaun maka’as ho rigorozu iha kapitál Díli hodi kontrola labele halo ema seluk hakfodak,” nia dehan.
Nia esplika, agora daudaun joven sira kuaze iha Díli no munisipiu sira seluk tiru fogetes no paixon arbiru de’it hodi perturba orden públiku hanesan iha Postu Administrativu Uatulari Munisipiu Viqueque to’o hamosu konfrontu no perturba ema nia toba kalan.
Tanba ne’e, Komandu Jerál hamutuk ho F-FDTL husu ba inan-aman sira atu fó hatene ba nia oan sira ne’ebé gosta sunu Fugetes karik di’ak liu lalika tiru, tanba PNTL no F-FDTL sei foti medida ne’ebé rigurozu no forti ba sidaudaun sira ne’ebé tiru Fugetes.
“Ami sei foti medida rigorozu ba sidadaun sira ne’ebé gosta tiru Fogetes, tanba Fogetes no paixon ne’ebé lian maka’as ne’e bele perturba ema nia deskansa. Ema presiza atu deskansa, la’ós ita tiru Fogetes ne’e iha loron meiu-dia tantu iha tempu kalan,” Pedro Belo salienta.
“Ami sei tama sai bairru-bairru sira iha Dili, karik joven sira, imi sei kontinua ida ne’e, ami sei la tolera. Bainhira ami ka’er-toman pasiénsia imi tenke ba toba iha sela, labele koko ami no ami-nia forsa karik, imi hakarak koko, mai ita koko forsa ba malu,” nia insiste.
Komisáriu PNTL Belo hateten, Timor-Leste ukun aan ona sidaudaun hotu hotu presiza hakmatek la’ós halo buat arbiru de’it.
“Sé de’it mak halo krime nia rasik mak sei simu nia konsíkuensia. Imi dehan nasaun demokrásia maibé imi labele lori imi direitus umanus ne’e lao tun lao sae, tanba ema hotu iha direitu, maibé tenke tuir lei, bainhira kontra fila-fali ba lei mak PNTL no F-FDTL sei la tolera,” nia dehan.
“Ami sei halo operasaun duni no operasaun ida ne’e ami sei la halimar. Ami sei halao operasaun ho F-FDTL durante loron bo’ot ne’e ita espera buat hotu lao diak. Sé bainhira rai ida ne’e mak la hakmatek diak liu mak seguransa rua lalika iha ona. Imi lakohi imi nia isin atu moras iha loron-bo’ot ida ne’e di’ak liu hakmatek iha uma no labele tiru Fugetes arbiru,” nia realsa.
Komisáriu PNTL ne’e hateten, PNTL sei ba buka tuir ema ne’ebé fa’an Fugetes inklui joven ne’ebé tiru Fugetes, kuandu hetan ema ruma mak faan fugetes iha dalan, PNTL no F-FDTL sei toma medida.
“Husu ba jovens sira servisu hamutuk ho autoridade seguransa PNTL no F-FDTL atu fó hatene ba ema ne’ebé fa’an Fugetes PNTL bele ba kaer atu nune’e situasaun bele la’o hakmetek iha rai ida ne’e,” nia alerta.
Jornalista: Natalino Costa
Editór: Rafael Ximenes de A. Belo
