BOBONARU, 01 Jullu 2026 (TATOLI) – Komunidade no lideransa lokál iha suku Bobonaru Vila, postu administrativu Bobonaru, munisípiu Bobonaru, husu ba Ministériu Obra Públika (MOP) atu buka solusaun hodi kontinua projetu reabilitasaun estrada rurál ho distánsia kilómetru 1,7, ne’ebé daudaun abandonadu durante tinan rua-resin husi empreza
Centeliziumen Unipesoál Lda,.
Tuir kontratu entre Governu no empreza, projetu ne’e hahú implementa iha 21 Abríl 2022 no, bazeia ba planu tenke ramata iha 20 Abríl 2023. Maibé, to’o tinan 2026, serbosi ne’e seidauk kontinua no obra ne’e nafatin para totál.
Xefe Suku Bobonaru Vila, Jacinto Godinho Pereira, hateten katak komunidade la fó sala ba propetáriu empreza tanba nia foin mate iha semana hirak liubá. Maibé, nia husu ba Governu sentrál atu tau atensaun ba projetu ne’e.
“Ha’u-nia maun, na’in ba kompañia ne’e agora Maromak bolu tiha ona. Tanba nia mate ona, ita la fó sala ba nia, mais husu nafatin ba Governu sentrál para bele tau-matan ba estrada ne’e bele kontinua ka la’e. Ida-ne’e mak ami husu”, nia dehan ba Tatoli, ohin.
Notísia relevante: Projetu estrada rurál kilómetru 18,45 iha Bobonaru hahú implementa
Komunidade João Perreira mós rekomenda ba Governu atu buka solusaun ba projetu ne’e, tanba durante tempu udan kondisaun estrada ne’e prejudika tebes movimentu uma no sasán, atividade ekonómika, asesu ba servisu saúde no atividade sosiál seluk.
Nia esplika katak estrada ne’e importante ba komunidade iha suku viziñu sira, hanesan Ai-Asa, Sibuni, Molop no Lour, ne’ebé loroloron uza dalan ne’e ba transporte no Natividad ekonomia.
“Governu atu kontinua fó kompañia ne’e mós ami prontu simu. Atu buka foun mós di’ak liután, importante mak serbisu fali, tanba estrada ne’e husi merkadu nia tun mai to’o edifísiu administrasaun postu Bobonaru ne’e cor hotu ona, maibé barak mak aat fali. Karreta rua hasoru malu, ida tenke buka dalan sai foin ida bele liu, depois tempu udan ne’e tahu dodok, los”, dehan.
Antes ne’e, iha 04 Juñu 2025, Administradór Postu Administrativu Bobonaru, Tomás Barreto Henriques, submete ona pedidu ba Ministériu Obra Públika atu hakotu kontratu ho empreza ne’e tanba konsidera abandona obra ne’e no falta kualidade serbisu.
Projetu reabilitasaun estrada rurál ho distánsia kilómetru 1,7 ne’e implementa ho valór kontratu $256.177,08 no hahú iha loron 21 Abríl 2022 ho data ramata 20 Abríl 2023. To’o agora, obra ne’e seidauk finaliza.
Notísia relevante: Komunidade husu MOP reabilita ponte-estrada rurál iha Bobonaru
Jornalista: Sergio da Cruz
Editora: Maria Auxiliadora
