iklan

ERMERA, SAÚDE

Prevene dengue, ekipa saúde Ermera halo sensibilizasaun ba komunidade sira

Prevene dengue, ekipa saúde Ermera halo sensibilizasaun ba komunidade sira

Diretór Servisu Saúde Ermera, Joni Alves. Imajen Tatoli/Felicidade Ximenes

DILI, 27 dezembru 2023 (TATOLI)— Diretór Servisu Saúde Ermera, Joni Alves, informa katak Ekipa saúde Ermera, halo ona sensibilizasaun informasaun ba komunidade sira atu halo prevensaun ba moras dengue nune’e mós sei fahe abate ba kada uma-kain.

“Ami-nia ekipa sira tama sai uma, fó sensibilizasaun informasaun ba komunidade sira liuhusi promosaun integradu saúde durante fulan ida tanba ita haree tempu udan ona nune’e bele prevene kazu dengue iha Munisípiu Ermera,” Joni Alves relata ba TATOLI via telefónika, foin lalais ne’e.

Nia afirma, Munisípiu Ermera, “Agora daudaun ita iha hela preparasaun atu fahe abate ba kada uma-kain sira atu nune’e ita bele prevene moras dengue ida ne’e tanba ita haree katak daudaun ne’e tempu udan”.

Pesoál saúde ne’e hatutan, ekipa saúde daudaun ne’e tama sai uma aviza ba komunidade atu halo limpeza iha kada bairru no aldeia sira hodi prevene kazu dengue.

Nia mós husu ba komunidade Ermera atu nafatin halo limpeza iha kada uma-kain sira nune’e la bele hamosu kazu dengue iha tempu udan ne’e.

“Husu ba populasaun sira atu kuidadu iha tempu ida ne’e. Bainhira haree bee-nalihun barak presiza hamoos atu nune’e labele hamosu kazu dengue, no mós fo’er sira ne’ebé mak iha tenke tau iha nia fatin, hamoos ambiente iha kada uma-kain sira fase tanke-bee semana ida mínimu dalarua,” nia reforsa.

Profisionál saúde Ermera ne’e mós informa, daudaun ne’e ai-moruk kímiku abate no fomigasaun sufiente hela iha Munisipiu Ermera hodi atende bainhira kazu dengue mosu.

Entertantu, husi janeiru to’o marsu 2023 Munisípiu Ermera rejista kazu dengue hamutuk 58 husi ne’e afeta ba labarik idade tinan 10 mai kraik. 

Jornalista: Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!