2024, SERVE,I.P halo rejistu movél ba uma ‘kost’ iha kapitál Dili
DILI, 28 dezembru 2023 (TATOLI)—Servisu Rejistu no Verifikasaun Emprezariál, Institutu Públiku (SERVE,I.P), hahú janeiru 2024, halo rejistu movél ba uma aluga (kost) iha kapitál Dili hodi hetan reseita no asegura seguransa ba ema hirak hela iha uma aluga refere.
Diretór Ezekutivu, SERVE,I.P, Florêncio Sanches, hateten, planu rejistu kona-ba uma aluga antes ne’e, sira-nia parte koordena ona ho Prezidente Autoridade Munisípiu Dili, nune’e hein jeneiru 2024 tun terrenu hodi ko’alia ho Xefe aldeia sira hato’o lista komunidade hira mak halo uma ‘kost’ no fó aluga ba ema hela maibé seidauk rejistu.
“Objetivu ita hakarak rejistu formál ba uma ‘kost’ ne’e la’os de’it ba nia reseita, maibé ita hakarak uma aluga sira ne’e iha seguransa nia-laran, tanba bainhira ita la regula ema halo atividade ilegál ruma iha laran mós ita la hatene,” hateten Florêncio Sanches ba Agência Tatoli, iha nia knaar-fatin, Hudi-Laran, Dili, kinta ne’e.
SERVE,I.P hala’o atividade rejistu movél ne’e tanba bazeia ba lei foun SERVE,I.P nian hateten, katak sira ne’ebé halo ona negósiu maibé la halo rejistrasaun bele multa $30.000.
Lei foun ne’e mak dekretu lei númeru 83/2022 koa’lia kona-ba lisensiamentu atividade ekonómiku ne’ebé vigór iha 01 jullu 2023.
Aleinde halo rejistu SERVE,I.P mós hakarak haree nia konstrusaun uma sira tuir padraun, karik la tuir padraun SERVE,I.P sei informa ba Ministériu Obra Públiku (MOP), ba parte saúde nian mak karik ijiene ladi’ak sei informa ba Ministériu Saúde (MS) atu haree. Atividade ne’e sei hala’o uluk iha Dili, hotu mak kontinua ba munisípiu sira.
SERVE,I.P halo rejistu ba uma aluga sira mós sei halo rejistu ba negósiu informal sira iha kada aldeia, tanba rejistu movél ba uma aluga no negósiu informal ne’e gratuita.
“Sira ita halo rejistu gratuita tanba halo negósiu individuál bolu ENIN, ne’ebé ita halo rejistu tinan ida sira hetan de’it lukru to’o $6.000 sira la selu buat ida, maibé hetan rendimentu tinan ida liu $6.000 entaun sira bele selu taxa 10% ba ninia lukru ba Estadu,” nia dehan.
Tanba, tuir lei tributária 08/2008 hateten sira ne’ebé halo negósiu hakarak ka lakohi tenke selu taxa ba Estadu, maibé haree ninia konta ne’e mak la hanesan.
Jornalista : Arminda Fonseca
Editór : Florencio Miranda Ximenes
