Indonézia konvida TL hodi hametin liután relasaun liuhosi Festivál Kupang
DILI, 28 dezembru 2023 (TATOLI) – Ministru Administrasaun Estatal (MAE), Tomas do Rosario Cabral, dehan Nusa Tenggara Timur (NTT), Indonézia konvida Timor-Leste (TL) atu tuir Festivál Kupang ne’ebé sei realiza iha abríl 2024 ho objetivu atu hametin liután relasaun entre nasaun rua iha área fronteira.
“Ida-ne’e vizita ofisiál no ida-ne’e delegasaun sira konvida ita atu tuir Festa Kupang iha fulan abríl 2024. Tanba antes ne’e, ita hala’o ona festivál ida iha Bobonaro no ita halo iha fronteira ho relasaun ne’ebé di’ak, nune’e ami-nia delegasaun simu sira ho di’ak, no ohin sira-nia delegasaun vizita fali ita-nia rai hodi koalia kona-ba festivál ida-ne’e”, Tomas Cabral hateten ba jornalista sira hafoin sorumutu ho delegasaun NTT iha Gabinete MAE, Caicoli, ohin.
Nia destaka importánsia hosi vizita sira ne’e atu hametin relasaun iha fronteira tanba nasaun rua ne’e viziñu, ida-ne’e ho tradisaun, lian no kulit ne’ebé ita hanesan, mak atu hametin relasaun ne’ebé eziste ba estabilidade nasaun rua ne’e nian.
Iha fatin hanesan, Xefe Gabinete Turizmu Sidade Kupang, Josefina Monica, afirma sorumutu ida-ne’e, Governu Kupang konvida Timor-Leste atu tuir festa kulturál iha fulan abril no agostu 2024.
“Objetivu husi festivál mak atu hametin relasaun no atu promove kultura sira ne’ebé iha ba publiku liuliu halo kompetisaun dansa no kultura ne’ebé mak ita-nia rai eziste ba”, osefina Monica konklui.
Jornalista : Felicidade Ximenes
Editór : Zezito Silva
