VIQUEQUE, 28 dezembru 2023 (TATOLI)-Postu saúde rua iha postu administrativu Uatucarbau, munisípiu Viqueque sei enfrenta problema rekursu umanu bainhira pesoál saúde kontratadu sira Governu liuhusi Ministériu Saúde (MS) la extende sira-nia kontratu, hodi kontinua serbisu.
“Ami sentru saúde postu Uatucarbau, rekursu umanu maka kontinua sai problema, foin lalais Ministra Saúde rasik maka fó katak atu hapara pesoál saúde sira-ne’ebé kontratadu. Entaun ida-ne’e sei fó impaktu ba ami-nia postu saúde Irabin de Cima no Bahatata, posibilidade bele taka tanba agora daudaun serbisu ne’ebá sira kontratadu maka destaka iha postu saúde rua ne’e,” Xefe sentru saúde Uatucarbau, Jermias Mota, hateten ba jornalista sira, iha resintu postu Uatucarbau, kinta ne’e.
Jermias reafirma, kontratu ida-ne’e maka remata 31 dezembru 2023 pesoál saúde sira-ne’ebé durante fó atendimentu ba abitante sira husi suku rua Bahatata no Irabin de Cima posiblidade bele taka.
“Ita haree de’it semana ohin maka pesoál saúde la asina sira-nia kontratu, entaun postu saúde rua ne’e bele taka tanba postu saúde rua mesak kontratadu maka iha postu saúde rua ne’e. Ema hetan osan maka bá halo servisu no halo atendementu ba ita-nia abitante sira iha área rural,” Jermias akresenta.
Nia dehan, postu saúde rua ne’e maka la funsiona sei fó impaktu ba abitante sira husi suku Bahatata no Irabin de Cima ne’ebé hela iha área rurál. Suku Bahatata postu saúde rua ida lokaliza iha Bubur Laran enfermeiru permanente na’in ida, postu saúde ida lokaliza iha suku Bahatata enfermeiru ida, saúde públika ida no parteira ida; na’in tolu kontratadu. Enkuantu, Postu saúde Irabin de Cima pesoál saúde na’in rua kompostu husi enfermeira ida no saúde públika ida kontratadu.
“Postu saúde rua ne’e maka ami agora haree ameasa atu taka, karik Governu hanoin pesoál saúde sira-nia kontratu entaun di’ak. Maibé, Governu deside hapara kontratadu sira-ne’e pasiénsia ita taka postu saúde sira-ne’e no ita-nia abitante sira pasiénsia tenke la’o dook maka foin hetan tratamentu”, nia hato’o.
Tuir dadús populasaun husi suku rua maka hanesan suku Irabin de Cima totál hamutuk na’in-1.269 no populasaun husi suku Bahatata hamutuk na’in-980, (dadús populasaun 2021).
“Ami pesoál saúde permanente iha postu Uatucarbau limitadu, oinsá mak ami bele koloka ba fatin postu saúde sira-ne’ebé ita-nia kontratadu sira servisu ba. Ita sei difikulta ita-nia abitante sira asesu ba saúde,” nia konsidera.
Enkuantu, tuir dadús pesoal saúde servisu iha postu Uatucarbau permente na’in sia no kontratadu hamutuk na’in-14 ne’ebé kompostu husi enfermeiru, parteira, saúde públika no mediku.
Jornalista:Vitorino Lopes da Costa
Editór : Rafael Ximenes de A. Belo
